Oʻzbekistonda oʻtgan yoz eng issiq yozlardan biri boʻldi

Oʻzbekistonda oʻtgan yoz eng issiq mavsumlardan biri boʻldi

Oʻzgidromet sharhiga koʻra, Oʻzbekistonda 2026 yilning avgusti, soʻnggi oʻn yillikdagi barcha avgust oylari kabi, iqlimiy meʼyordan issiqroq boʻldi.

Oʻrtacha oylik havo harorati koʻp yillik koʻrsatkichlardan 1,9−3 darajaga, Buxoro viloyatida, Navoiy, Qashqadaryo va Surxondaryo viloyatlarining ayrim joylarida esa 3,1−3,6 darajaga yuqori boʻldi.

«Mamlakat hududining katta qismida bunday issiq avgust Oʻzbekistonda meteorologik kuzatuvlar tarixida ilk bor qayd etildi», — deyiladi sharhda.

Qashqadaryo va Surxondaryo viloyatlarining aksariyat tumanlarida oʻtgan oy kuzatuvlar tarixidagi eng issiq uchta avgust oyi qatoridan joy oldi.

Oy oʻrtacha hisobda juda issiq boʻlgan boʻlsa-da, maksimal havo harorati deyarli hech qayerda rekord darajaga yetmadi. Eng issiq kunlarda havo harorati +39…+41 darajagacha, shimolda, janubda va choʻl hududlarida +42…+44 darajagacha, Termizda esa +45 darajagacha koʻtarildi.

Havo harorati +40 daraja va undan yuqori boʻlgan kunlar soni 1−6 kunni, Buxoro, Navoiy, Qashqadaryo va Surxondaryo viloyatlarida 7−14 kunni, Muborak va Termiz hududida esa 18−21 kunni tashkil etdi.

Avgust oyi, shuningdek, haddan tashqari quruq keldi. Aksariyat hududlarda yomgʻir umuman yogʻmadi yoki uning miqdori 0,0−0,4 mm dan oshmadi.

Ayrim togʻli hududlarda 2−4 marta yomgʻir yogʻishi kuzatildi, ammo u yerda ham bir oylik yogʻingarchilikning umumiy miqdori 1−4 mm dan oshmadi. Faqat Toshkent va Fargʻona viloyatlarining ayrim togʻli stantsiyalarida bu koʻrsatkich oyiga 6−12 mm ga yetdi, bu esa meʼyordan pastdir.

Oʻzbekistonda oʻtgan yoz eng issiq yoz mavsumlari reytingida ikkinchi oʻrinni egalladi, ayrim hududlarda esa kuzatuvlar tarixidagi eng issiq mavsum boʻldi. Oʻrtacha mavsumiy havo harorati meʼyordan 1,2−2,6 darajaga yuqori boʻldi.

Butun mavsum davomida eng yuqori maksimal havo harorati iyul oyida kuzatildi. Oʻzbekiston hududining katta qismida issiqlik oyning oʻrtalarida eng yuqori choʻqqisiga chiqdi. Shu kunlarda havo harorati +43…+45 darajagacha, janubda va choʻl hududlarida esa +46…+50 darajagacha koʻtarildi. Bir qator hududlarda yangi harorat rekordlari oʻrnatildi.

«Shunday qilib, 2026 yil yozining harorat rejimi Oʻzbekistonda yoz mavsumlarining isishi tendentsiyasini davom ettirdi», — deyiladi sharhda.

Aksariyat hududlarda 2026 yil yozidagi yogʻingarchilik miqdori meʼyordan past boʻldi. Yoz mavsumidagi umumiy yogʻingarchilik miqdoriga asosiy hissani iyun oyi qoʻshdi, bu oyda yomgʻirlar ancha tez-tez yogʻib turdi.