Oʻzbekistonda mobil internet qamrovi aholi yashaydigan hududlarning 99,5 foiziga yetdi
Oʻzbekistondagi aholi punktlarining 99,5 foizi mobil aloqa tarmogʻi bilan kamrab olingan, xalqaro ahamiyatga molik avtomobil yoʻllarining 95,5 foizi boʻylab esa mobil internet mavjud, dedi Raqamli texnologiyalar vaziri Sherzod Shermatov parlament soʻroviga bergan javobida.
Oʻzbekistonda mobil internet qamrovi aholi yashaydigan hududlarning 99,5 foiziga yetdi
Oliy Majlis Qonunchilik palatasi vazirning «Raqamli Oʻzbekiston — 2030» strategiyasida belgilangan maqsadlarga erishish borasidagi ishlar toʻgʻrisidagi hisobotini maʼlumot uchun qabul qildi.
2026 yil boshidan buyon mamlakat boʻylab 11 mingdan ortiq mobil aloqa bazaviy stantsiyalari oʻrnatilib, ularning umumiy soni 110 500 taga yetkazildi, dedi Shermatov.
Soʻnggi yillarda magistral tarmoqlar oʻtkazuvchanlik qobiliyati ham kengaytirildi. 2020 yilga nisbatan hududiy darajadagi oʻtkazuvchanlik 400 dan 600 Gbit/s gacha, tumanlar darajasida esa 40 dan 60 Gbit/s gacha oshdi.
Tolali-optik infrastruktura kengaymoqda
Oʻzbekiston tolali-optik aloqa tarmogʻini sezilarli darajada kengaytirib, umumiy uzunligini 2020 yildagi 119 500 km dan 397 000 km ga yetkazdi. Tolali-optik infrastruktura hozirda aholi yashaydigan hududlarning 98,1 foizini qamrab olgan boʻlib, hukumat 2026 yil oxirigacha bu koʻrsatkichni 98,2 foizga yetkazishni maqsad qilgan.
Mamlakatda ijtimoiy soha obʼyektlarini yuqori tezlikdagi internetga ulash ishlari ham davom ettirildi. Vazirning soʻzlariga koʻra, yuqori tezlikdagi maʼlumot uzatish tarmoqlari hozirda 10 657 ta umumtaʼlim muassasasi, 6 988 ta maktabgacha taʼlim tashkiloti, 5 786 ta sogʻliqni saqlash muassasasi, 8 935 ta fuqarolarning oʻzini oʻzi boshqarish organi (mahalla) va 5 250 ta mahalliy ichki ishlar boʻlimini qamrab olgan.
Oʻzbekiston internet tezligi reytinglarida oʻz oʻrnini yaxshiladi
Oʻzbekiston xalqaro internet tezligi reytinglarida yuqorilab, mobil internet tezligi boʻyicha 133-oʻrindan 72-oʻringa, simli keng polosali internet tezligi boʻyicha esa 112-oʻrindan 73-oʻringa koʻtarildi. Shermatovning taʼkidlashicha, mamlakat hozirda simli internet tezligi boʻyicha Markaziy Osiyoda birinchi oʻrinni egallab turibdi.
Xalqaro internet tarmogʻiga ulanish imkoniyati (oʻtkazuvchanlik manbai) ham ortdi. U 2020 yilda 1 200 Gbit/s ni tashkil etgan boʻlsa, investitsiya loyihalari va xalqaro internet kanallarining diversifikatsiya qilinishi tufayli 4 400 Gbit/s ga yetdi.
Hukumat ushbu oʻtkazuvchanlikni 2026 yil oxirigacha 4 500 Gbit/s ga, 2030 yilga borib esa 5 000 Gbit/s ga yetkazishni rejalashtirmoqda.
Parlament muhokamasi chogʻida deputatlar erishilgan yutuqlarni xolis baholash, mavjud muammolarni hal etish va strategiya maqsadlariga oʻz vaqtida erishishni taʼminlash boʻyicha chora-tadbirlarni taklif qildilar. Shundan soʻng Qonunchilik palatasi vazirning javobini maʼlumot uchun qabul qildi.