Oʻzbekistonda koʻp qavatli uylar atrofidagi oʻzboshimchalik bilan egallab olingan yer uchastkalarini tartibga solish topshirildi

Oʻzbekistonda koʻp qavatli uylar atrofidagi oʻzboshimchalik bilan egallab olingan yer uchastkalarini tartibga solish topshirildi

Oʻzbekistonda xususiy bogʻcha, maktab va texnikumlar uchun yer uchastkalari, agar tadbirkorlar ehtiyojmand oilalar farzandlarini bepul oʻqitishga tayyor boʻlsa, 1 million soʻmlik boshlangʻich narx bilan auktsionga chiqarilishi mumkin.

Bu haqda 9 sentyabr kuni Prezident Shavkat Mirziyoyev raisligida aholi bandligini taʼminlash va daromadlarini oshirish masalalariga bagʻishlab oʻtkazilgan kengaytirilgan yigʻilishda soʻz bordi.

Ijobiy misol sifatida Oqoltin tumani tajribasi tilga olindi, u yerda tadbirkor 880 oʻrinli xususiy maktab ochib, kam taʼminlangan oilalarning 110 nafar farzandini bepul oʻqitmoqda.

Bunda dasturda ishtirok etish shartlaridan biri — bunday bolalarning ota-onalarini ish bilan taʼminlash va darslarga muntazam qatnashishini taʼminlashdir. Yigʻilishda taʼkidlanganidek, bunday yondashuv bir vaqtning oʻzida ota-onalarga ish, bolalarga esa sifatli taʼlim berish imkonini beradi.

Hazorasp tumanidagi tikuvchilik korxonasidagi vaziyat alohida koʻrib chiqildi, u yerda 400 ga yaqin ish oʻrni boʻsh turibdi. Koʻpgina ayollar bolalariga qarash uchun sharoit yoʻqligi sababli korxonaga ishga joylasha olmayapti.

Korxona rahbari bolalar bogʻchasi qurish uchun yer uchastkasi ajratilgan taqdirda, ishchilarni oziq-ovqat va transport bilan taʼminlashga tayyorligini bildirdi.

Shu munosabat bilan, agar tadbirkorlar bogʻcha, maktab va texnikumlar tashkil etish boʻyicha tayyor loyihalarni taklif qilsa hamda ehtiyojmand oilalar farzandlarini bepul oʻqitish niyatida boʻlsa, davlat ular uchun yer uchastkalarini 1 million soʻmlik boshlangʻich narx bilan auktsionga chiqarishga tayyorligi qayd etildi.

Bundan tashqari, koʻp qavatli uylar atrofidagi boʻsh hududlarni aniqlash va oʻzboshimchalik bilan egallab olingan yer uchastkalarini tartibga solish topshirildi. Bunday hududlarda bolalar maydonchalari, sport va fitnes zonalari, umumiy foydalanishdagi yashil maydonlar tashkil etish, shuningdek, koʻchalarni yoritish tizimini yaxshilash rejalashtirilmoqda.

Aholini sogʻlom turmush tarziga jalb etishga alohida eʼtibor qaratildi. Mahalla va koʻchalarda ommaviy yurish, jismoniy mashqlar, shuningdek, ertalabki va kechki badantarbiya mashgʻulotlarini tashkil etish taklif qilindi.

Shuningdek, maktab, texnikum, oliy oʻquv yurtlari va boshqa tashkilotlarning boʻsh turgan xonalaridan yoshlar, ayollar va ishsizlarni kasb-hunar, hunarmandchilik va chet tillariga ommaviy oʻqitish uchun foydalanish topshirildi. Buning uchun oʻquv auditoriyalarini darsdan tashqari vaqtlarda jalb etish taklif qilinmoqda.

Eslatib oʻtamiz, Oʻzbekiston rasmiylari turar joy binolarining birinchi qavatlarida biznes ochishni ham soddalashtirmoqchi. Kvartiralardan noturar joy fondiga oʻtkazmasdan doʻkon, salon, atelye va ustaxonalar sifatida foydalanishga ruxsat berish taklif etilmoqda. Buning uchun ruxsat berish tartibidan xabardor qilish tartibiga oʻtish rejalashtirilgan.