Oʻzbekistonda gripp va OʻRVI bilan kasallanishning mavsumiy ortishiga tayyorgarlik koʻrilmoqda
Oʻzbekistonda gripp va OʻRVI bilan kasallanishning mavsumiy ortishiga tayyorgarlik koʻrilmoqda
Oʻzbekistonda odatda noyabr–fevral oylariga toʻgʻri keladigan gripp va oʻtkir respirator virusli infektsiyalar (OʻRVI) bilan kasallanish holatlarining mavsumiy ortishi kutilmoqda. Sogʻliqni saqlash vazirligi maʼlumotlariga koʻra, hozirda epidemiologik vaziyat barqarorligicha qolmoqda, tibbiyot muassasalari esa kuz-qish davriga tayyorgarlik koʻrmoqda.
Bu haqda 15 oktyabr kuni SSV matbuot xizmati tomonidan tashkil etilgan brifingda Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Otabekov maʼlum qildi.
Uning soʻzlariga koʻra, 2026 yilning toʻqqiz oyi davomida gripp va OʻRVI bilan kasallanish oʻtgan yilning shu davriga nisbatan kamaygan. Shu bilan birga, qayd etilgan holatlarning salmoqli qismi Toshkent shahriga toʻgʻri kelmoqda.
Otabekov yuqori xavf guruhiga olti yoshgacha boʻlgan bolalar va 65 yoshdan oshgan kishilar kirishini eslatib oʻtdi. Inkubatsiya davri bir kundan toʻrt kungacha davom etishi mumkin. Odatda kasallik haroratning keskin koʻtarilishi, yoʻtal, mushaklar, tomoq va boʻgʻimlardagi ogʻriqlar bilan boshlanadi.
Qator holatlarda gripp asoratlarni, jumladan, pnevmoniya, sinusit va otitni keltirib chiqaradi. Bolalarda, shuningdek, nafas olishning qiyinlashishi, suvsizlanish, ishtaha yoʻqolishi va diareya kuzatilishi mumkin.
Qoʻmita vakilining soʻzlariga koʻra, kuz-qish mavsumiga shifoxonalar va oilaviy poliklinikalar tayyorlab qoʻyilgan: zarur dori-darmonlar, kislorod va tibbiy uskunalar zaxirasi yaratilgan, shuningdek, shoshilinch yordam koʻrsatish choralari koʻrilgan. Qoʻmita epidemiologik vaziyatni nazorat qilishda davom etmoqda.
Ustuvor vazifalar qatorida Otabekov kasallanganlarni oʻz vaqtida aniqlash, zarurat tugʻilganda patsiyentlarni statsionarlarga tezkorlik bilan yuborish va uyda davolanayotganlarni nazorat qilishni aytib oʻtdi. Bundan tashqari, jamoat joylarida, transportda va ish joylarida sanitariya-gigiyena qoidalariga rioya qilinishi ustidan nazoratni kuchaytirish rejalashtirilmoqda.
Avvalroq Sogʻliqni saqlash vazirligi ota-onalarga bolalarda OʻRVI va grippning oldini olish choralariga rioya qilishni: ularni qoʻl yuvishga oʻrgatish, kasallanganlar bilan muloqotda boʻlishdan saqlanish va ilk simptomlar paydo boʻlganda uyda qoldirishni tavsiya qilgan edi.