Oʻzbekistonda fuqaro aviatsiyasi uchun yangilangan qoidalar joriy etildi
Oʻzbekistonda fuqaro aviatsiyasi uchun yangilangan qoidalar tasdiqlandi
«Oʻzaviatsiya» agentligi Xalqaro fuqaro aviatsiyasi tashkiloti (ICAO) talablariga toʻliq asoslangan yangilangan aviatsiya qoidalarini qabul qildi. Ushbu hujjatlar havo harakatiga xizmat koʻrsatish, aeronavigatsiya xaritalari va aeronavigatsiya axboroti xizmatlari faoliyatiga taalluqlidir.
Yangi hujjatlar Adliya vazirligida roʻyxatdan oʻtkazilgan boʻlib, Xalqaro fuqaro aviatsiyasi toʻgʻrisidagi konventsiyaning 11-ilovasi «Havo harakatiga xizmat koʻrsatish» qoidalariga muvofiq tayyorlangan.
Bundan tashqari, Agentlik direktori aeronavigatsiya xaritalari va aeronavigatsiya axboroti xizmatlari boʻyicha normativ-texnik hujjatlarni tasdiqladi.
Xalqaro fuqaro aviatsiyasi tashkiloti (ICAO) — BMTning ixtisoslashgan muassasasi boʻlib, fuqaro aviatsiyasi sohasidagi xalqaro hamkorlikni muvofiqlashtiradi. Uning asosiy vazifasi butun dunyoda xalqaro aviatsiyaning xavfsiz va tartibli rivojlanishini taʼminlashdan iborat.
ICAO parvozlar xavfsizligi, havo harakatiga xizmat koʻrsatish, aeronavigatsiya, aeroportlar faoliyati va aviatsiyaning boshqa texnik jihatlariga qoʻyiladigan talablarni belgilovchi xalqaro standartlar va tavsiya etiladigan amaliyotni ishlab chiqadi. Davlatlar ular asosida oʻzlarining aviatsiya qoidalarini shakllantiradi va yangilaydi.
Tashkilot faoliyati aviatsiya tizimining alohida elementlariga ham daxldordir. Xususan, ICAO aeroportlarga parvozlar rejalarida, aeronavigatsiya va meteorologiya maʼlumotlarida, shuningdek, aviatsiya xaritalarida foydalaniladigan toʻrt harfli kodlarni biriktiradi. Tashkilot, shuningdek, havo hududini tashkil etish va turli mamlakatlar aviatsiya xizmatlarining oʻzaro hamkorligiga yagona yondashuvlarni ishlab chiqishda ishtirok etadi.
Shu tariqa, ICAO standartlari turli davlatlarning aviatsiya tizimlariga bir-biriga mos keladigan qoidalar asosida ishlash imkonini beradi. Bu, ayniqsa, havo kemalari bir nechta mamlakatlarning havo hududini kesib oʻtadigan xalqaro parvozlar uchun juda muhimdir.
, Oʻzbekiston aerodromlarni kalibrlash boʻyicha ixtisoslashtirilgan xizmatni yoʻlga qoʻymoqda — alohida aviatsiya tuzilmasi har bir qoʻnishning aniqligi uchun javobgar boʻladi.