Oʻzbekistonda ekostiker yoʻqligi uchun jarima solinishi haqidagi xabarlar rad etildi
SYXXX ekologik stikerning yoʻqligi uchun BHMning 10 barobari miqdorida jarima nazarda tutilmaganini, uni olish esa bepulligicha qolayotganini maʼlum qildi.
Oʻzbekistonda ekostiker yoʻqligi uchun jarima solinishi haqidagi xabarlar rad etildi
Oʻzbekiston Yoʻl harakati xavfsizligi xizmati ijtimoiy tarmoqlarda tarqalayotgan, 1 yanvardan eʼtiboran ekologik stiker yoʻqligi uchun bazaviy hisoblash miqdorining (BHM) 10 baravari miqdorida jarima joriy etilishi hamda uni rasmiylashtirish pulli boʻlishi haqidagi maʼlumotlarni rad etdi.
YHXX bunday choralar uchun hech qanday huquqiy asoslar mavjud emasligini maʼlum qildi va fuqarolarni vakolatli davlat organlarining rasmiy resurslarida joylashtirilgan maʼlumotlarga tayanishga chaqirdi.
Oʻzbekistonda «Ekologik transport» tizimi amal qilmoqda, unga koʻra avtomobillar ekologiyaga yetkazadigan taʼsir darajasiga qarab uchta: yashil, sariq va qizil kategoriyalarga boʻlinadi.
Tegishli stikerni My.gov.uz portali orqali yoki YHXXning roʻyxatdan oʻtkazish boʻlinmalarida olish mumkin. Birinchi marta berish, shuningdek, yiliga bir marotaba qayta olish bepul amalga oshiriladi.
Ekologik stiker muddatsiz beriladi, shu sababli uni har yili almashtirish talab etilmaydi. Shu bilan birga, sariq va qizil kategoriyalarga kiritilgan avtomobillar egalari yuqoriroq ekologik kategoriyani olish uchun yiliga bir marta bepul qayta diagnostikadan oʻtishlari mumkin.
Ekologik stikerlarni berish qoidalari Oʻzbekiston Vazirlar Mahkamasining 2025 yil 28 noyabrdagi 750-sonli qarori bilan tasdiqlangan.
YHXX haydovchilarga oʻz transport vositalarining ekologik kategoriyasini aniqlab, tegishli stikerni rasmiylashtirishni tavsiya etadi.