Oʻzbekistonda dalalar boʻylab «basketbol» chiqindi qutilari oʻrnatila boshlandi

Oʻzbekistonda dalalar boʻylab «basketbol» chiqindi qutilari oʻrnatila boshlandi

Qishloq xoʻjaligi vazirligi qishloq xoʻjaligi yerlari va yoʻl boʻyidagi hududlar tozaligini saqlashga qaratilgan ekologik tashabbusni eʼlon qildi.

Basketbol savatlari uslubida bezatilgan nostandart chiqindi konteynerlari yoʻl boʻylarida, dalalar yaqinida joylashtirila boshlandi.

Loyihaning asosiy vazifasi — haydovchi va yoʻlovchilarni chiqindilarni faqat maxsus ajratilgan joylarga tashlashga oʻrgatish hamda dalalarga tutash hududlarning ifloslanishiga yoʻl qoʻymaslikdir.

Idora yoʻl harakati qatnashchilariga murojaat qilib, harakatlanayotgan avtomobillar derazalaridan plastik butilkalar va boshqa chiqindilarni uloqtirmaslikni, balki xavfsiz joylarda toʻxtab, maxsus qutilardan foydalanishni soʻradi.

«Xavfsiz joyda toʻxtab, merganligingizni sinab koʻring: nishon dala emas, balki chiqindi qutisi boʻlishi kerak! Agar savatga tushira olmasangiz, chiqindini yerda qoldirmang», — deyiladi Qishloq xoʻjaligi vazirligi xabarida.

Bundan tashqari, Qishloq xoʻjaligi vazirligi fermerlar va mahalliy hokimliklar vakillarini ushbu tashabbusni qoʻllab-quvvatlashga chaqirdi: qulay joylarda konteynerlar oʻrnatish boʻyicha hamkorlikdagi ishlarni yoʻlga qoʻyish va ularning oʻz vaqtida tozalanishini taʼminlash soʻraldi.