Oʻzbekistonda bolalarni tarbiyalash va ularga taʼlim berish boʻyicha ota-onalarning masʼuliyati kuchaytirildi

Oʻzbekistonda ota-onalarning bolalarni lozim darajada tarbiyalamaganligi, voyaga yetmaganlarni diniy taʼlimga jalb etganligi va majburiy taʼlim olishiga toʻsqinlik qilganligi uchun maʼmuriy javobgarligi kuchaytirildi. Tegishli oʻzgarishlarni prezident imzoladi, deb xabar beriladi uning rasmiy saytida.

Voyaga yetmagan bolalarni tarbiyalash va ularga taʼlim berish borasidagi majburiyatlarni bajarmaganlik uchun jarima bazaviy hisoblash miqdorining (BHM) 1–5 baravaridan 5–10 baravarigacha oshirildi. Agar huquqbuzarlik bir yil davomida takroran sodir etilsa, jarima miqdori ilgarigi 5–10 BHM oʻrniga 10–15 BHMni tashkil etadi.

Bolani diniy taʼlimga noqonuniy jalb etganlik uchun endilikda BHMning 10 baravaridan 15 baravarigacha miqdorda jarima belgilandi. Ilgari u 5–10 BHMni tashkil etardi. Bir yil davomida takroran sodir etilganda BHMning 15 baravaridan 20 baravarigacha miqdorda jarima solish yoki 15 sutkagacha maʼmuriy qamoqqa olish nazarda tutilgan.

Bundan tashqari, bolalarning majburiy umumiy oʻrta, oʻrta maxsus va professional taʼlim olishiga toʻsqinlik qilganlik uchun jarimalar oshirildi. Endilikda ular ilgarigi 10–15 BHM oʻrniga 15–20 BHMni tashkil etadi. Takroriy huquqbuzarlik uchun BHMning 20 baravaridan 30 baravarigacha miqdorda jarima yoki 15 sutkagacha maʼmuriy qamoqqa olish nazarda tutilgan.

Shuningdek, voyaga yetmagan shaxsga nisbatan zarur parvarishni koʻrsatmaganlik uchun BHMning 5 baravaridan 10 baravarigacha miqdorda jarima joriy etiladi. Bunda ota-onalar yoki ularning oʻrnini bosuvchi shaxslar tomonidan, agar ularda zarur imkoniyatlar, bilim va koʻnikmalar mavjud boʻla turib, bolaning asosiy ehtiyojlari qasddan qondirilmasligi tushuniladi. Bunday harakatsizlik bolaning sogʻligʻi, jismoniy, aqliy yoki axloqiy rivojlanishining buzilishiga olib kelishi kerak.