Oʻzbekistonda abituriyentlar eng koʻp tanlagan OTM ochiqlandi
Oʻzbekistonda 2026-yilgi qabul jarayonlarida abituriyentlar orasida eng koʻp talab boʻlgan oliy taʼlim tashkilotlari va taʼlim yoʻnalishlari maʼlum qilindi. Tanlovda Toshkent davlat iqtisodiyot universiteti, Oʻzbekiston davlat jahon tillari universiteti va Mirzo Ulugʻbek nomidagi Oʻzbekiston Milliy universiteti yetakchilik qilgan.
Oʻzbekistonda abituriyentlar orasida eng mashhur boʻlgan oliy taʼlim muassasalari aniqlandi. Vazirlik tomonidan taqdim etilgan maʼlumotlarga koʻra, joriy yilda uchta universitet talabgorlar tomonidan eng koʻp tanlangan.
Ushbu roʻyxatda Toshkent davlat iqtisodiyot universiteti (TDIU), Oʻzbekiston davlat jahon tillari universiteti (OʻzDJTU) hamda Mirzo Ulugʻbek nomidagi Oʻzbekiston Milliy universiteti (OʻzMU) yetakchilik qilmoqda.
Shuningdek, abituriyentlar eng koʻp qiziqish bildirgan taʼlim yoʻnalishlari ham eʼlon qilindi. Bular orasida "Davolash ishi", "Iqtisodiyot" hamda "Filologiya va tillarni oʻqitish: ingliz tili" yoʻnalishlari alohida ajralib turadi.
Joriy yilgi qabul natijalariga koʻra, davlat granti asosida oʻqishga kirish uchun oʻrtacha oʻtish bali 134,6 ballni tashkil etgan. Toʻlov-kontrakt asosida oʻqishga kirish uchun esa oʻrtacha oʻtish bali 93,7 ballni tashkil qilgan.