Oʻzbekistonda 557 ming nafar qaytgan migrant daromadli ish bilan taʼminlandi — vazir

Oʻzbekistonda 557 ming qaytgan migrant daromadli bandlik bilan taʼminlandi — vazir

Mehnat migratsiyasidan qaytgan 661 ming Oʻzbekiston fuqarosidan 557 ming nafari daromadli faoliyatga jalb etildi. Bu haqda 29 sentyabr kuni Qonunchilik palatasining yalpi majlisida kambagʻallikni qisqartirish va bandlik vaziri Botir Zohidov maʼlum qildi.

Uning soʻzlariga koʻra, yana 70 ming nafar qaytgan migrantning xohish-istaklari va qiziqishlarini inobatga olgan holda ularning bandligini taʼminlash boʻyicha ishlar davom ettirilmoqda.

Vazir, shuningdek, joriy yilning toʻrt oyida 275 ming oila kambagʻallik toifasidan chiqarilganini, birinchi yarim yillikda esa norasmiy ishlayotgan 615 ming kishining faoliyati soyadan olib chiqilganini taʼkidladi.

Botir Zohidovning soʻzlariga koʻra, hisobot davrida 294 ming kambagʻal oilaga yoki 1,3 million kishiga daromadlarini oshirishga qaratilgan 376 mingta xizmat koʻrsatilgan.

Ushbu oilalar aʼzolaridan 105 ming kishi doimiy ishga joylashtirildi, 259 ming kishi tadbirkorlikka jalb etildi, yana 12 ming kishi kasb-hunarga oʻqitildi.

Ehtiyojmand oilalarning tadbirkorlik tashabbuslarini qoʻllab-quvvatlash uchun 2 trln soʻm kredit va 265 mlrd soʻm subsidiya ajratildi.

Chegaraoldi va anklav hududlarda joylashgan 563 ta mahallada daromadlarning oʻsishi hisobiga, vazirning soʻzlariga koʻra, 84 ming kishini kambagʻallikdan chiqarishga erishildi.

Raqamli texnologiyalar vazirligi bilan hamkorlikda kambagʻal oilalarning 49 ming nafar farzandi IT, ingliz tili, elektron tijorat, SMM va grafik dizayn boʻyicha bepul masofaviy kurslarda tahsil oldi. Yana 125 ming bola qoʻshimcha toʻgaraklarga jalb etildi.

Rasmiy maʼlumotlarga koʻra, 1 iyul holatiga koʻra band aholi soni 11,6 million kishiga yetdi va yil boshidan buyon 657 ming kishiga koʻpaydi.

Vazir mamlakat mehnat resurslarining 76 foizini yoki 16 million kishini mehnat faoliyatiga tayyor boʻlgan iqtisodiy faol aholi tashkil etishini maʼlum qildi.

Birinchi yarim yillikda loyihaviy yondashuv asosida 469 ming kishi doimiy ishga joylashtirildi, 2,7 million kishining daromadi oshdi.

Mahallalarda hisobot davrida 103 mingta mikroloyiha ishga tushirilib, ular tufayli 246 ming kishi asosiy yoki qoʻshimcha daromad manbaiga ega boʻldi. Bunday loyihalarning 22 mingda tasiga kambagʻal oilalarning 30 ming nafar aʼzosi tadbirkor yoki yollanma ishchi sifatida jalb etildi. Yil yakuniga qadar yana 60 mingta mikroloyihani ishga tushirish rejalashtirilgan.

Birinchi yarim yillikda kichik va oʻrta biznesga 76 trln soʻm kredit ajratildi, shundan 19 trln soʻmi tadbirkorlikni qoʻllab-quvvatlash dasturlari doirasida berildi.

Joriy yilda davlat byudjetidan 1245 ta mahalla va 70 ta tuman infratuzilmasini yaxshilash uchun 9 trln soʻm ajratildi.

Ushbu mablagʻlar hisobidan 3200 ta obʼyektda qurilish ishlari olib borilmoqda.

Bundan tashqari, 2653 ta xonadonda quyosh panellari oʻrnatildi, yana 1727 ta uy «yashil» standartlar asosida taʼmirlandi.

Botir Zohidov hokim yordamchilarining faoliyatiga alohida toʻxtalib oʻtdi.

«Fevraldan may oyigacha vazirlik va idoralarning rahbar xodimlari ishchi guruhlar tarkibida hududlarga borib, hokim yordamchilari uchun oʻquvlar tashkil etdi. 8785 nafar hokim yordamchisi tayyorgarlikdan oʻtdi, yana 209 nafar eng istiqbolli mutaxassis Yaponiya, Turkiya, Xitoy va Rossiyaga malaka oshirishga yuborildi. Shuningdek, ularning faoliyatini baholashning yangi tizimi joriy etildi, unda asosiy eʼtibor ishning soniga emas, balki sifatiga qaratiladi», — dedi vazir.

Uning soʻzlariga koʻra, endilikda asosiy mezonlar yaratilgan barqaror ish oʻrinlari soni, daromadi oshgan oilalar soni va faoliyati barqarorlashgan tadbirkorlik subʼyektlari soni hisoblanadi.

2026 yil yakuniga qadar rasmiylar yana 583 ming kishini doimiy ishga joylashtirishni, 2 million kishining daromadini oshirishni va norasmiy band boʻlgan 661 ming kishini soyadan olib chiqishni rejalashtirmoqda.

Shuningdek, ijtimoiy-iqtisodiy vaziyati ogʻir boʻlgan 37 ta tuman va 915 ta mahallada kambagʻallik darajasini kamida ikki baravar qisqartirish vazifasi qoʻyilgan.

Birinchi yarim yillik yakunlariga koʻra, vazirning maʼlumotlariga koʻra, mamlakatda kambagʻallik va ishsizlik darajasi 4,5 foizgacha kamaydi.

25 avgust kuni Jamshid Qoʻchqorov Qonunchilik palatasi yigʻilishida kambagʻallik va ishsizlikni qisqartirish koʻrsatkichlariga izoh berar ekan, prezident Shavkat Mirziyoyev kambagʻallikka qarshi kurash natijalarini baholashga boʻlgan yondashuvning oʻzini oʻzgartirishni talab qilganini maʼlum qildi.

U, shuningdek, Oʻzbekistonning 1,4 mlnga yaqin fuqarosi 40 ga yaqin davlatda mehnat qilayotganini maʼlum qildi. Ularning qariyb 60 foizi Rossiyada boʻlib turibdi. Shu bilan birga, mehnat migratsiyasi geografiyasida MDH davlatlarining ulushi kamaydi, Yevropa va Sharqiy Osiyo yoʻnalishlari ulushi esa oshdi.