Oʻzbekiston yana sakkizta Hyundai Rotem yuqori tezlikdagi poyezdlarini sotib olishni rejalashtirmoqda
Oʻzbekiston yana sakkizta Hyundai Rotem yuqori tezlikdagi poyezdlarini sotib olmoqchi
"Oʻzbekiston temir yoʻllari" delegatsiyasi Janubiy Koreyaning Hyundai Rotem kompaniyasi bilan yuqori tezlikdagi poyezdlarni yangilash va yana sakkizta tarkibni sotib olish imkoniyatini muhokama qildi. Yangi poyezdlarda zamonaviy oʻrindiqlarga ega alohida VIP-vagonlar paydo boʻladi.
"Oʻzbekiston temir yoʻllari" AJ delegatsiyasi Berlinda InnoTrans 2026 xalqaro transport texnologiyalari koʻrgazmasi doirasida Janubiy Koreyaning Hyundai Rotem kompaniyasi rahbariyati bilan muzokaralar oʻtkazdi.
Uchrashuvning asosiy mavzularidan biri yoʻlovchilar uchun qulaylikni oshirish boʻldi. Tomonlar allaqachon rejalashtirilgan yuqori tezlikdagi tarkiblardagi oxirgi ikkita vagonni oʻzgartirishga kelishib oldilar. Ularda biznes-klass oʻrindiqlari oʻrniga stolli VIP-oʻrindiqlar oʻrnatiladi. Har bir tarkibda bittadan shunday vagon boʻladi.
Bundan tashqari, "Oʻzbekiston temir yoʻllari" va Hyundai Rotem sakkizta yuqori tezlikdagi elektropoyezdni sotib olish boʻyicha yangi shartnomani muhokama qildilar.
Har bir yangi tarkib tarkibiga alohida VIP-vagon kiritilishi nazarda tutilmoqda. Unda zamonaviy kapsulali oʻrindiqlar oʻrnatish rejalashtirilgan. Yakuniy konfiguratsiya va xususiyatlar hujjatlarni tayyorlash jarayonida belgilanadi.
Hyundai Rotem bilan muzokaralar Oʻzbekiston delegatsiyasining InnoTrans 2026 koʻrgazmasidagi ishchi dasturining bir qismi boʻldi. Berlinda "Oʻzbekiston temir yoʻllari" delegatlari, shuningdek, Yevropa komissiyasi, Xitoyning CRRC Corporation Limited, Deutsche Bahn, Serbiya, Litva, Estoniya, Latviya temir yoʻl kompaniyalari va Chexiyaning Skoda Group vakillari bilan uchrashdilar.
CRRC bilan yangi poyezdlarga texnik xizmat koʻrsatish, lokomotivlar sotib olish, lokomotivlarni taʼmirlash va ularga xizmat koʻrsatish boʻyicha servis markazini tashkil etish, shuningdek, gʻildirak juftligi kengligini oʻzgartirish imkoniyatiga ega zamonaviy yuk vagonlarini ishlab chiqarish muhokama qilindi.
Deutsche Bahn bilan tomonlar oʻzbekistonlik mutaxassislarning malakasini oshirish va hamkorlikdagi ilmiy ishlanmalar boʻyicha kelishib oldilar. Shuningdek, Huawei va boshqa texnologik kompaniyalar bilan temir yoʻl sohasini raqamlashtirish boʻyicha muzokaralar boʻlib oʻtdi.
InnoTrans koʻrgazmasi Berlinda har ikki yilda bir marta oʻtkaziladi va temir yoʻl hamda jamoat transporti sohasidagi yangi texnologiyalarni namoyish etish boʻyicha eng yirik xalqaro maydonlardan biri hisoblanadi.
Avvalroq Oʻzbekistonda turli yoʻnalishlar boʻyicha Hyundai Rotem kompaniyasining yangi "Jaloliddin Manguberdi" yuqori tezlikdagi elektropoyezdlari yoʻlga qoʻyilishi haqida xabar berilgan edi.