Oʻzbekiston va YUNISEF ijtimoiy himoya strategiyasini muhokama qildi
Oʻzbekistonda YUNISEF va Jahon banki ishtirokida turli xavf-xatarlarni hisobga olgan holda moslashuvchan ijtimoiy himoya strategiyasi ishlab chiqilmoqda.
Oʻzbekiston va YUNISEF ijtimoiy himoya strategiyasini muhokama qildi
3 sentyabr kuni Oʻzbekiston Iqtisodiyot va moliya vazirligida vazir oʻrinbosari Otabek Fozilkarimovning YUNISEF vakillari bilan uchrashuvi boʻlib oʻtdi, unda mamlakatning moslashuvchan ijtimoiy himoya strategiyasini ishlab chiqish masalasi muhokama qilindi.
Muhokamada Jahon banki va Ijtimoiy himoya milliy agentligi vakillari, shuningdek, xalqaro va milliy konsultantlar ham ishtirok etdi.
Tomonlar iqlim, tabiiy va iqtisodiy xavf-xatarlarni hisobga olgan holda aholini ijtimoiy qoʻllab-quvvatlash mexanizmlarini takomillashtirishni nazarda tutuvchi strategiyani tayyorlashning asosiy yondashuvlarini koʻrib chiqdilar.
Uy xoʻjaliklarining turli xavf-xatarlarga chidamliligini oshirish va ijtimoiy yordamni oʻz vaqtida koʻrsatish mexanizmlarini yaxshilashga alohida eʼtibor qaratildi. Shuningdek, tomonlar moslashuvchan ijtimoiy himoya sohasida idoralararo hamkorlikni rivojlantirish masalasini muhokama qildilar.
Uchrashuv yakunlari boʻyicha hujjat ustida ishlashning keyingi yoʻnalishlari belgilab olindi. Xususan, manfaatdor tomonlar bilan maslahatlashuvlar oʻtkazish va xalqaro tajribani oʻrganish rejalashtirilgan.
Bundan tashqari, Oʻzbekistonda alohida eʼtibor talab etadigan favqulodda vaziyatlar, shuningdek, tabiiy va iqlim xavf-xatarlarini hamda tegishli chora koʻrish mexanizmlarini aniqlash lozim boʻladi.
Uchrashuv yakunida tomonlar Moslashuvchan ijtimoiy himoya strategiyasi ustida birgalikda ishlashni davom ettirish va aholini ijtimoiy qoʻllab-quvvatlash mexanizmlarini yanada takomillashtirishga kelishib oldilar.