Oʻzbekiston va Turkiya oʻzaro qishloq xoʻjaligi mahsulotlari savdosini oshirishni rejalashtirmoqda

Oʻzbekiston va Turkiya qishloq xoʻjaligi mahsulotlarining oʻzaro savdosini koʻpaytirish niyatida

Oʻzbekiston qishloq xoʻjaligi vaziri Ibrohim Abdurahmonov mamlakatimizda boʻlib turgan, Turkiya qishloq va oʻrmon xoʻjaligi vaziri Ibrohim Yumakli boshchiligidagi delegatsiya bilan uchrashuv oʻtkazdi.

Muzokaralar davomida tomonlar agrar sohadagi ikki tomonlama hamkorlikning bugungi holati, mavjud imkoniyatlar va istiqbolli qoʻshma loyihalarni muhokama qildilar. Sheriklikni mustahkamlashga, xususan, qishloq xoʻjaligi sohasidagi hamkorlikni rivojlantirish boʻyicha ishchi guruhning navbatdagi yigʻilishini tashkil etishga alohida eʼtibor qaratildi.

Bundan tashqari, tomonlar hamkorlikning asosiy yoʻnalishlarini, jumladan, chorvachilik va yem-xashak bazasini rivojlantirish, urugʻchilik sohasidagi aloqalarni kengaytirish hamda ekinlarning qurgʻoqchilikka chidamli navlarini yaratishni koʻrib chiqdilar. Shuningdek, qishloq xoʻjaligi mahsulotlarining oʻzaro eksporti va importi bilan shugʻullanuvchi tadbirkorlar sonini koʻpaytirish, baliqchilikni rivojlantirish va ilm-fan sohasidagi aloqalarni mustahkamlash boʻyicha fikr almashildi.

Dastur doirasida Ibrohim Yumakli boshchiligidagi Turkiya delegatsiyasi Ibrohim Abdurahmonov hamrohligida Toshkent davlat agrar universitetiga tashrif buyurib, u yerda talabalar uchun yaratilgan sharoitlar, zamonaviy infratuzilma va yosh mutaxassislarni tayyorlash jarayoni bilan tanishdi.