Oʻzbekiston va Qirgʻiziston chegarasida yangi "Keskanyor" oʻtkazish punkti paydo boʻladi
Oʻzbekiston va Qirgʻiziston chegarasida yangi «Keskanyor» oʻtkazish punkti ochiladi
Oʻzbekiston-Qirgʻiziston chegarasida yangi «Keskanyor» oʻtkazish punkti paydo boʻladi, u hozirda faoliyat koʻrsatayotgan «Doʻstlik» punktidan ikki baravar katta boʻladi. U ishga tushirilgach, ikki davlat oʻrtasidagi yuk tashish hajmi ikki-uch baravarga ortishi, chegaradan oʻtish esa bir haftaga tezlashishi kutilmoqda.
Bu haqda Prezident Shavkat Mirziyoyev raisligida Andijon viloyatini ijtimoiy-iqtisodiy rivojlantirish, tadbirkorlikni qoʻllab-quvvatlash va aholi daromadlarini oshirish masalalariga bagʻishlab oʻtkazilgan yigʻilishda maʼlum qilindi.
«Keskanyor»ning tashkil etilishi hududdagi transport oqimlarining oʻsishi bilan bogʻliq. Xususan, «Xitoy – Qirgʻiziston – Oʻzbekiston» temir yoʻli ishga tushirilgach, Andijon viloyati orqali yuk tashish hajmini oʻn baravarga — yiliga 15 million tonnagacha oshirish rejalashtirilgan.
Oʻsib borayotgan yuk oqimiga xizmat koʻrsatishni taʼminlash maqsadida yil yakuniga qadar Qoʻrgʻontepa va Xonabodda 300 gektar maydonda qiymati 600 million dollarlik logistika majmuasi loyihasini boshlash topshirildi.
Shuningdek, 78 kilometrlik «Xonabod – Andijon» pullik avtomobil yoʻlini loyihalashtirish boshlanadi.
Yana bir transport loyihasi «Toshkent – Andijon» pullik yoʻli boʻladi. Uni qurish boʻyicha amaliy ishlarni kelgusi yilda boshlash rejalashtirilgan.
Shu bilan birga, sentyabr oyidan boshlab «Toshkent – Andijon» tezyurar poyezdi qatnay boshladi. Shaharlar oʻrtasidagi yoʻl vaqti olti soatdan toʻrt soatgacha qisqardi.