Oʻzbekiston va Pokiston yetakchilari qoʻshma loyihalarni jadallashtirishga kelishib oldi
Bishkek shahrida Oʻzbekiston Respublikasi prezidenti Shavkat Mirziyoyev Pokiston Islom Respublikasi bosh vaziri Shahboz Sharif bilan uchrashuv oʻtkazdi.
Oʻzbekiston va Pokiston rahbarlari qoʻshma loyihalarni tezlashtirish boʻyicha kelishuvga erishdilar.
Muzokaraning boshida Oʻzbekiston rahbari Pokistonni Shanxay hamkorlik tashkilotiga raislikni qabul qilgani bilan samimiy tabrikladi.
Joriy yilning fevral oyida Islomobodga amalga oshirilgan tarixiy tashrif va oliy darajadagi uchrashuvlar ikki davlat oʻrtasidagi munosabatlarni yangi sifat bosqichiga olib chiqqani alohida taʼkidlandi.
Muloqot davomida savdo-iqtisodiy, investitsiyaviy, transport va logistika sohalarida hamkorlikni yanada kengaytirish masalalari muhokama qilindi.
Uchrashuvda hududlararo hamkorlikni rivojlantirish va gumanitar aloqalarni mustahkamlash masalalariga ham eʼtibor qaratildi. Xususan, joriy yilda Xiva shahrida Hududlararo forum oʻtkazishga tayyorgarlik koʻrilayotgani hamda Pokistonda Oʻzbekiston madaniyati va kinosi kunlarini tashkil etish rejalashtirilayotgani qayd etildi.
Toʻqimachilik, tibbiyot, farmatsevtika, qishloq xoʻjaligi va boshqa muhim sohalardagi loyihalarni jadallashtirish maqsadida qoʻshma “yoʻl xaritasi”ni qabul qilishga kelishib olindi.