Oʻzbekiston va Misr suv xoʻjaligini boshqarish boʻyicha tajriba almashadi

Oʻzbekiston va Misr suv xoʻjaligi sohasida tajriba almashadi

Oʻzbekiston elchisi Mansurbek Qilichev Misr suv resurslari va irrigatsiya vaziri Hani Sevilam bilan uchrashib, boʻlajak tashrifga tayyorgarlik masalalarini muhokama qildi, deb xabar beradi agentlik. Muzokaralar markazida Oʻzbekiston hukumati delegatsiyasining oʻnlab fermer va tadbirkorlar hamrohligida 14–20 sentyabr kunlari Misrga amalga oshiradigan tashrifini tashkil etish masalalari turdi.

Xabarga koʻra, Sevilam Misr ikki tomonlama muzokaralar oʻtkazishga va suv resurslarini boshqarish boʻyicha oʻz tajribasi bilan oʻrtoqlashishga tayyorligini bildirgan, shuningdek, Misr Oʻzbekistonning suv xavfsizligini taʼminlash borasidagi tajribasini oʻrganishga katta qiziqish bildirayotganini taʼkidlagan.

U ikki davlat suv xoʻjaligi idoralari tomonidan 2009 yilda imzolangan Oʻzaro tushunish memorandumini amalga oshirish muhimligini taʼkidladi. Uning soʻzlariga koʻra, shu paytgacha ushbu sohadagi ikki tomonlama hamkorlik asosan xalqaro forumlarda ishtirok etish bilan cheklanib qolgan edi.

Muzokaralardan soʻng vazir Oʻzbekiston delegatsiyasining boʻlajak tashrifi muvaffaqiyatli oʻtishini taʼminlash uchun zarur boʻlgan barcha yordamni koʻrsatishga toʻliq tayyorligini yana bir bor tasdiqladi.