Oʻzbekiston va Koreya sanʼat sohasidagi hamkorlikni kengaytiradi

**Oʻzbekiston va Koreya sanʼat sohasidagi hamkorlikni kengaytiradi**

Oʻzbekiston Madaniyat va sanʼatni rivojlantirish jamgʻarmasi hamda Koreya sanʼat kengashi (ARKO) madaniyat va sanʼat sohasidagi hamkorlikni kengaytirishga kelishib oldilar. Ikki tomon 5 sentyabr kuni oʻzaro anglashuv memorandumini imzoladi.

Bitim bir qator sohalarda, jumladan, koʻrgazma va kuratorlik ishlari, tadqiqot tashabbuslari hamda ikki mamlakat rassomlari va tegishli mutaxassislari ishtirokidagi almashinuvlar boʻyicha qoʻshma loyihalarni amalga oshirishni nazarda tutadi.

Hamkorlikning yana bir yoʻnalishi Oʻzbekiston va Koreya Respublikasidagi muzeylar hamda boshqa madaniy muassasalar oʻrtasida boʻladi. Tomonlar, shuningdek, muzey ishi sohasida professional aloqalarni oʻrnatish va tajriba almashishni maqsad qilgan.

Memorandumga koʻra, tomonlar sanʼatni qoʻllab-quvvatlash va rivojlantirishning turli yondashuvlarini, shuningdek, zamonaviy muzey amaliyotini oʻrganadilar.

Hamkorlikning ushbu shakli ikki davlat madaniyat sohasi vakillari oʻrtasidagi professional almashinuvlarni kengaytirishga xizmat qilishi kutilmoqda.