Oʻzbekiston va KOICA hamkorlikning yangi yoʻnalishlarini muhokama qildilar
Oʻzbekiston va KOICA SI, raqamlashtirish, sogʻliqni saqlash, qishloq xoʻjaligi va iqlim sohalarida hamkorlikni rivojlantirishni muhokama qildi.
Oʻzbekiston va KOICA hamkorlikning yangi yoʻnalishlarini muhokama qildi
3 sentyabr kuni Oʻzbekiston tashqi ishlar vaziri maslahatchisi Munira Aminova Koreya xalqaro hamkorlik agentligining (KOICA) Oʻzbekistondagi vakolatxonasi yangi direktori Kim Myon Jin bilan uchrashdi. Suhbat chogʻida tomonlar Oʻzbekiston-Koreya hamkorligining bugungi holati va uning istiqbollarini koʻrib chiqdilar.
Oʻzbekistonda ijtimoiy va infratuzilma loyihalarini amalga oshirishda KOICAning salmoqli ishtiroki alohida qayd etildi.
Uchrashuv ishtirokchilari sunʼiy intellekt va raqamlashtirish sohasidagi hamkorlikka alohida eʼtibor qaratdilar. Xususan, sogʻliqni saqlash, qishloq xoʻjaligi va taʼlim sohalarida sunʼiy intellekt texnologiyalarini qoʻllash imkoniyatlari muhokama qilindi.
Mavzular qatorida iqlim oʻzgarishi va suv resurslarini boshqarish masalalari ham bor edi.
Tomonlar sheriklikni yanada kengaytirish va yangi qoʻshma tashabbuslarni tayyorlashdan oʻzaro manfaatdor ekanliklarini bildirdilar.
Bunda Oʻzbekistonning milliy rivojlanish ustuvorliklari va Koreya Respublikasi tajribasini hisobga olish rejalashtirilgan.
Uchrashuv ishtirokchilari, shuningdek, kelgusi hamkorlikning istiqbolli yoʻnalishlari va loyihalarini belgilashda yaqin muvofiqlashtirish va muntazam fikr almashish muhimligini taʼkidladilar.