Oʻzbekiston va Janubiy Koreya IT-kompaniyalar uchun «yumshoq qoʻnish» dasturini muhokama qildi

Oʻzbekiston va Janubiy Koreya IT-kompaniyalar uchun «yumshoq qoʻnish» dasturini muhokama qildi

Raqamli texnologiyalar vaziri oʻrinbosari Jamol Maqsudov va IT Park Uzbekistan ijrochi direktori Jahongir Rajabov boshchiligidagi Oʻzbekiston delegatsiyasi Seulda Koreya startaplar va tadbirkorlikni rivojlantirish instituti (KISED) rahbariyati bilan muzokaralar oʻtkazdi.

Uchrashuvning asosiy mavzusi ikki mamlakat texnologik ekotizimlari oʻrtasidagi aloqalarni mustahkamlash hamda Oʻzbekiston va Koreya startaplarini xalqaro bozorlarga olib chiqish boʻldi.

Tomonlar qoʻshma «yumshoq qoʻnish» (soft landing) dasturini ishga tushirish va loyihalar bilan almashish imkoniyatlarini muhokama qildilar. Oʻzbekiston IT-kompaniyalari Janubiy Koreya bozoriga chiqishda, Koreya startaplari esa Oʻzbekiston va Markaziy Osiyo bozorini oʻzlashtirishda qoʻllab-quvvatlanadi. Dastur maslahatlar, mentorlik, B2B uchrashuvlar va mahalliy hamkorlarni izlashni oʻz ichiga oladi.

IT Park Uzbekistan rezidentlari Koreyaning xalqaro dasturlarida, jumladan, K-Startup Grand Challenge, Global Market Expansion Program va K-Startup Centers dasturlarida ishtirok etish imkoniyatiga ega boʻladilar.

Bundan tashqari, 2027 yilda Oʻzbekiston-Koreya startap-forumini oʻtkazish, shuningdek, investitsiyaviy sessiyalar va texnologiya kompaniyalariga tashriflarni oʻz ichiga olgan oʻzaro biznes-missiyalarni tashkil etish istiqbollari koʻrib chiqildi.

Shuningdek, oʻzbekistonlik startaplarga Koreya venchur fondlari, investorlari, korporatsiyalari va texnologik ekotizimning boshqa ishtirokchilari bilan aloqalar oʻrnatishda yordam berish uchun KISED tarmogʻidan foydalanish masalasi muhokama qilindi.

KISED — Koreya Respublikasi Kichik, oʻrta biznes va startaplar vazirligi huzuridagi davlat institutidir. U startaplarni barcha bosqichlarda: taʼlim va akseleratsiyadan tortib, investitsiyalarni jalb qilish va mahsulotlarni jahon bozoriga olib chiqishgacha kuzatib boradi.