Oʻzbekiston va Indoneziya ziyorat turizmi sohasidagi hamkorlikni kengaytirmoqda

**Oʻzbekiston va Indoneziya ziyorat turizmi sohasidagi hamkorlikni kengaytirmoqda**

Oʻzbekiston va Indoneziya ziyorat turizmi sohasidagi hamkorlikni, jumladan, sayyohlar almashinuvini rivojlantirish, toʻgʻridan-toʻgʻri aviaqatnovlarni yoʻlga qoʻyish va turoperatorlar oʻrtasidagi sheriklikni kengaytirish orqali rivojlantirishni rejalashtirmoqda.

Bu haqda Oʻzbekiston Turizm qoʻmitasi raisi Abdulaziz Aqqulovning Indoneziya Haj va umra ishlari boʻyicha vaziri Muhammad Irfan Yusuf bilan uchrashuvi yakunlari boʻyicha maʼlum boʻldi.

Muzokaralarning asosiy mavzularidan biri ikki davlat oʻrtasidagi sayyohlar oqimini oshirish boʻldi. Xususan, tomonlar Toshkent — Jakarta yoʻnalishi boʻyicha toʻgʻridan-toʻgʻri reyslarni yoʻlga qoʻyish, shuningdek, Toshkentni Oʻzbekistonning tarixiy shaharlari bilan bogʻlaydigan toʻgʻridan-toʻgʻri aviaqatnovlarni tashkil etish imkoniyatlarini muhokama qildilar.

Uchrashuv ishtirokchilari davlat rahbari tomonidan taklif etilgan yangi aviareyslarni subsidiyalash mexanizmlarini qoʻllash imkoniyatlarini ham koʻrib chiqdilar. Bundan tashqari, Indoneziyadan sayyohlarni jalb qiluvchi mahalliy turoperatorlarga har bir jalb etilgan sayyoh uchun 100 dollar miqdorida subsidiya toʻlanishi rejalashtirilgan.

Indoneziya bozori ziyorat turizmini rivojlantirish uchun istiqbolli yoʻnalish hisoblanadi. Har yili 2 milliondan ortiq Indoneziya fuqarosi haj va umra amallarini ado etadi.

Oʻzbekistonda 1 200 dan ortiq ziyorat turizmi obʼyektlari mavjud. Ular orasida Imom Buxoriy, Imom Moturidiy, Imom Termiziy va Bahouddin Naqshband merosi bilan bogʻliq qadamjolar bor.

Indoneziyalik vazirning tashrifi davomida Samarqand va Buxoro shaharlaridagi ziyoratgohlarga sayohat tashkil etildi. Uning yakunlari boʻyicha tomonlar ushbu shaharlarni Indoneziya bozorida ziyorat turizmi yoʻnalishlari sifatida targʻib qilish, maxsus turistik marshrutlarni ishlab chiqish hamda ikki mamlakat haj va umra operatorlari oʻrtasida B2B uchrashuvlarini oʻtkazishga kelishib oldilar.

Hamkorlikning amaliy qadamlaridan biri indoneziyalik investorlar ishtirokida Imom Buxoriy majmuasi hududida besh yulduzli «Hadith Hotel» mehmonxonasining ishga tushirilishi boʻladi.

Tomonlar, shuningdek, «Umra plyus» dasturini rivojlantirish, turoperatorlar oʻrtasidagi hamkorlikni kengaytirish va ziyorat turizmi infratuzilmasini takomillashtirishni koʻrib chiqmoqdalar. Ushbu chora-tadbirlar Oʻzbekistonning Indoneziya turizm bozoridagi mavqeini mustahkamlash va ushbu mamlakatdan keluvchi sayyohlar sonini oshirishga qaratilgan.