Oʻzbekiston va BASF kimyoviy mahsulotlarni mahalliylashtirishni muhokama qildi
Oʻzbekiston va BASF togʻ-kon sanoati uchun kimyoviy mahsulotlar ishlab chiqarish, texnologiyalar transferi va Markaziy Osiyoga ehtimoliy eksport masalalarini muhokama qildi.
Oʻzbekiston va BASF kimyoviy mahsulotlarni mahalliylashtirishni muhokama qildi
Oʻzbekistonda togʻ-kon va metallurgiya tarmoqlari uchun Germaniyaning BASF kompaniyasi kimyoviy mahsulotlari va texnologik yechimlari ishlab chiqarishni mahalliylashtirish imkoniyatlari oʻrganilmoqda. Sanoat kooperatsiyasi va davlat xaridlari agentligida «BASF Markaziy Osiyo» vakillari bilan ishchi uchrashuv boʻlib oʻtdi.
Muzokaralarda asosiy eʼtibor mahalliy korxonalar bazasida togʻ-kon va metallurgiya sanoatida qoʻllaniladigan flotatsiya reagentlari, maxsus kimyoviy moddalar va yordamchi materiallar ishlab chiqarishga qaratildi.
Uchrashuv ishtirokchilari mahalliy xomashyo va mavjud ishlab chiqarish quvvatlari salohiyatini, shuningdek, texnologiyalarni transfer qilish imkoniyatlarini koʻrib chiqdilar. Ishlab chiqarishni yoʻlga qoʻyish uchun bir nechta variantlar, jumladan, toʻgʻridan-toʻgʻri investitsiyalar, qoʻshma korxona tashkil etish, kontraktli ishlab chiqarish va tolling modeli muhokama qilinmoqda.
Muzokaralarning alohida mavzusi Oʻzbekistonda ishlab chiqarilgan mahsulotlarni Markaziy Osiyoning boshqa mamlakatlari bozorlariga yetkazib berish istiqbollari boʻldi.
Uchrashuv yakunlariga koʻra, Agentlik BASF kompaniyasiga respublikada oʻzlashtirish uchun tavsiya etilgan 20 turdagi import oʻrnini bosuvchi mahsulotlar boʻyicha loyiha tizerlarini yuborishni rejalashtirmoqda.
Olingan takliflarni BASF kompaniyasining mintaqaviy va global biznes-boʻlinmalari bilan birgalikda oʻrganish koʻzda tutilgan. Tahlildan soʻng BASF faoliyati yoʻnalishlariga mos keladigan loyihalar belgilab olinadi.
Kompaniyada qiziqish uygʻotgan tashabbuslar boʻyicha loyihalarni yanada batafsil ishlab chiqish uchun alohida texnik muzokaralar oʻtkazish nazarda tutilgan.