Oʻzbekiston va AQSH oʻrtasidagi hamkorlik uchun yangi imkoniyatlar ochilmoqda - Saida Mirziyoyeva
Saida Mirziyoyeva AQSH davlat kotibi Marko Rubio bilan Samarqanddagi Registon maydoniga tashrif buyurdi. Uning maʼlum qilishicha, jurnalistlar bilan muloqotda Samarqandning xalqaro savdodagi tarixiy oʻrni va Oʻzbekiston–AQSH hamkorligining yangi imkoniyatlari haqida soʻz borgan.
Oʻzbekiston va AQSH hamkorligi uchun yangi imkoniyatlar yuzaga kelmoqda — Saida Mirziyoyeva
Rubio Samarqand bir necha asrlar davomida xalqaro savdo aloqalarining muhim markazi boʻlib kelganini taʼkidlagan. Bugun esa bu hudud ikki davlat oʻrtasidagi hamkorlikni kengaytirishga qaratilgan muloqotlarga mezbonlik qilmoqda.
Prezident administratsiyasi rahbari Saida Mirziyoyeva davlat kotibining Oʻzbekistonga ilk safarining aynan Samarqandda oʻtayotgani alohida ramziy maʼnoga ega ekanini qayd etgan.
Avvalroq Rubio Oʻzbekistonga Amerika kompaniyalarining yuz nafardan ortiq vakilidan iborat delegatsiya bilan tashrif buyurayotgani haqida xabar berilgan edi.
Safar dasturida Samarqandda C5+1 formati — Markaziy Osiyoning besh davlati va AQSH tashqi siyosat idoralari rahbarlarining uchrashuvi ham bor. Shuningdek, Oʻzbekiston rahbariyati va mintaqa mamlakatlari vakillari bilan muzokaralar ham rejalashtirilgan.
Uchrashuvlarning asosiy mavzulari iqtisodiy hamkorlik, savdo, xususiy investitsiyalar, energetika xavfsizligi va mintaqaviy oʻzaro bogʻliqlikni rivojlantirishdan iborat.
Samarqand C5+1 formati tarixida ham alohida oʻrin egallaydi: ushbu muloqot maydoni 2015-yil noyabr oyida aynan shu shaharda ishga tushirilgan. U Oʻzbekiston, Qozogʻiston, Qirgʻiziston, Tojikiston, Turkmaniston va AQSHni birlashtiradi.