Oʻzbekiston va Abu-Dabi APK sohasidagi hamkorlikni muhokama qildi
Oʻzbekiston elchisi Umid Shadiyev ADAFSA bilan muzokaralar oʻtkazdi. Tomonlar Oʻzbekiston mahsulotlarini BAAga yetkazib berishni rivojlantirish boʻyicha ishchi guruh tuzishga kelishib oldilar.
Oʻzbekiston va Abu-Dabi agrosanoat majmuida hamkorlikni muhokama qildi
Oʻzbekiston va Abu-Dabi qishloq xoʻjaligi hamda oziq-ovqat xavfsizligi sohasidagi hamkorlikni rivojlantirish, shuningdek, BAA bozoriga Oʻzbekiston mahsulotlarini yetkazib berishni kengaytirish uchun qoʻshma ishchi guruh tuzishga kelishib oldi.
Bunday qaror Oʻzbekiston elchisi Umid Shadiyevning Abu-Dabi Qishloq xoʻjaligi va oziq-ovqat xavfsizligi boshqarmasi (ADAFSA) rahbariyati bilan uchrashuvida qabul qilindi.
Muzokaralar davomida tomonlar agrosanoat sektoriga investitsiyalarni jalb qilish, qishloq xoʻjaligi mahsulotlarini chuqur qayta ishlashni rivojlantirish va ularning Birlashgan Arab Emirliklariga eksportini oshirish masalalarini koʻrib chiqdilar.
Oʻzbekiston tomoni emirlik hamkorlarini qishloq xoʻjaligini modernizatsiya qilish, zamonaviy agrosanoat klasterlarini tashkil etish hamda mahsulotlarni saqlash va qayta ishlash infratuzilmasini rivojlantirishga qaratilgan islohotlar bilan tanishtirdi.
Oziq-ovqat mahsulotlarining xalqaro sifat va xavfsizlik standartlarini joriy etish, eksportga yoʻnaltirilgan tovarlar ishlab chiqarishni koʻpaytirish va logistikani takomillashtirishga alohida eʼtibor qaratildi.
Uchrashuv doirasida istiqbolli investitsiya loyihalari, jumladan Surxon Agro zamonaviy agrosanoat klasterini tashkil etish ham taqdim etildi.
ADAFSA va Oʻzbekiston Investitsiyalar, sanoat va savdo vazirligi mutaxassislari ishtirokida tuzilayotgan ishchi guruh BAA bozorida xaridorgir boʻlgan Oʻzbekiston qishloq xoʻjaligi va oziq-ovqat mahsulotlari turlarini aniqlash bilan shugʻullanadi.
Uning ishtirokchilari yetkazib berishning mumkin boʻlgan hajmlari, ularga qoʻyiladigan talablar va emirlik bozoriga kirish shartlarini oʻrganadilar, shuningdek, muqobil transport-logistika yoʻnalishlarini ishlab chiqadilar.
Bundan tashqari, ADAFSA koʻmagida agrosanoat va oziq-ovqat sektorlarida faoliyat yuritayotgan BAAning yetakchi kompaniyalari vakillaridan iborat delegatsiyaning Oʻzbekistonga tashrifini tashkil etish rejalashtirilmoqda.