Oʻzbekiston Sogʻliqni saqlash vazirligi kasalxonaga yotqizilgan Qozogʻiston fuqarolarining ahvoli haqida maʼlumot berdi

Oʻzbekiston Sogʻliqni saqlash vazirligi shifoxonaga yotqizilgan Qozogʻiston fuqarolarining ahvoli haqida maʼlumot berdi

Oʻzbekiston Sogʻliqni saqlash vazirligi Toshkentda oʻtkir diareya belgilari bilan shifoxonaga yotqizilgan Qozogʻistonning 20 nafar fuqarosining ahvoli haqida batafsil maʼlumot berdi. Idora xabariga koʻra, ikki nafar bemorga allaqachon javob berilgan, qolganlarning ahvoli barqaror va qoniqarli deb baholanmoqda.

SSV matbuot xizmati aniqlik kiritishicha, Qozogʻistondan kelgan bolalarning bir qismi va ularga hamrohlik qiluvchi shaxslarda ilk simptomlar 1 noyabr kuni poytaxtdagi mehmonxonalardan biridagi nonushtadan soʻng paydo boʻlgan. Menyuda tuxum va sosiskalar boʻlgan, ular dastlabki maʼlumotlarga koʻra, yetarlicha qovurilmagan.

Oʻsha kuni 13 kishida qayt qilish, diareya, qorinda ogʻriq va tana haroratining koʻtarilishi kuzatilgan. Ular Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markaziga yetkazilgan va birinchi yordam koʻrsatilgach, 5-sonli shahar klinik yuqumli kasalliklar shifoxonasiga oʻtkazilgan.

2–3 noyabr kunlari shifoxonaga xuddi shunday simptomlar bilan yana yetti kishi yotqizilgan.

Tekshiruv natijalariga koʻra, barcha 20 nafar bemorga dastlabki «oʻtkir diareya» tashxisi qoʻyilgan. Ularga belgilangan tibbiy standartlarga muvofiq davolash tayinlangan.

SSV reanimatsiya boʻlimida bemorlar yoʻqligini taʼkidladi. Shifoxonaga yotqizilganlarning barchasi shifokorlar nazoratida.

Shu bilan birga, Sanitariya-epidemiologik osoyishtalik va jamoat salomatligi qoʻmitasi isteʼmol qilingan oziq-ovqat mahsulotlari qoldiqlaridan namunalar olgan. Laboratoriya tadqiqotlari davom etmoqda. Tekshiruvning yakuniy natijalari haqida qoʻshimcha maʼlumot beriladi.