Oʻzbekiston Qoʻshilmaslik harakatiga raislik qilishga tayyorlanmoqda
Sodiq Safoyev boshchiligidagi Oʻzbekiston delegatsiyasi Belgradda Qoʻshilmaslik harakatining 65 yilligiga bagʻishlangan uchrashuvda ishtirok etdi.
Oʻzbekiston Qoʻshilmaslik harakatiga raislik qilishga tayyorgarlik koʻrmoqda
Oliy Majlis Senati raisining birinchi oʻrinbosari Sodiq Safoyev boshchiligidagi Oʻzbekiston delegatsiyasi Qoʻshilmaslik harakati tashkil etilganining 65 yilligiga bagʻishlangan yuqori darajadagi Xotira uchrashuvida ishtirok etdi. Tadbir 31 avgust — 1 sentyabr kunlari Belgradda boʻlib oʻtdi.
Uchrashuvda 30 dan ortiq xorijiy davlatlarning yuqori martabali vakillari ishtirok etdi. Ular orasida prezidentlar va hukumat rahbarlari, parlament raislari, bosh vazir oʻrinbosarlari va vazirlar boshchiligidagi delegatsiyalar bor edi.
Tadbirni ochar ekan, Serbiya prezidenti Belgradning 1961 yilda Qoʻshilmaslik harakatining birinchi konferentsiyasi oʻtkazilgan joy sifatidagi tarixiy ahamiyatini taʼkidladi. Uning soʻzlariga koʻra, harakatning asosiy tamoyillari bugungi kunda ham oʻz dolzarbligini saqlab qolmoqda.
Oʻzbekiston delegatsiyasi rahbari oʻz nutqida Qoʻshilmaslik harakatining zamonaviy xalqaro munosabatlardagi rolini qayd etdi, shuningdek, Oʻzbekistonning 2027–2030 yillarda ushbu tashkilotga raislik qilishi arafasidagi ustuvor yoʻnalishlarni belgilab berdi.
Asosiy yoʻnalishlar qatorida Oʻzbekiston Prezidenti Shavkat Mirziyoyevning xalqaro maydonlarda ilgari surgan tashabbuslari alohida qayd etildi. Ular tinchlik va xavfsizlikni taʼminlash, iqtisodiy hamkorlikni rivojlantirish, iqlim oʻzgarishi sohasidagi hamkorlik va yoshlar bilan ishlash masalalariga daxldordir.
Uchrashuv doirasida Serbiya Prezidenti Aleksandr Vuchichning Oʻzbekiston delegatsiyasi bilan muzokaralari boʻlib oʻtdi.
Tomonlar ikki davlat prezidentlari tomonidan qoʻllab-quvvatlanayotgan faol siyosiy muloqot asosida koʻp qirrali Oʻzbekiston-Serbiya munosabatlari jadal rijvolanayotganini taʼkidladilar.
Parlamentlararo aloqalarni yanada kengaytirish, shuningdek, iqtisodiyot, investitsiyalar va savdo sohalaridagi hamkorlikka alohida eʼtibor qaratildi. Tomonlar qoʻshma loyihalarni amalga oshirish masalalarini ham muhokama qildilar.
Bundan tashqari, Oʻzbekiston vakillari Serbiya Respublikasi Xalq skupshchinasi Spikeri oʻrinbosari Marina Ragush va boshqa xorijiy delegatsiyalar rahbarlari bilan uchrashuvlar oʻtkazdilar.