Oʻzbekiston miniatyura sanʼati Riyodda namoyish etildi

Oʻzbekiston miniatyura sanʼati Riyodda namoyish etildi

Oʻzbekiston mustaqilligining 35 yilligi munosabati bilan Riyod shahrida madaniy kecha hamda «Miniatyura sanʼati: Buxorodan Arabiston yarim oroligacha. Muqaddas qadamjolarga eltuvchi yoʻllardagi hikoyalar» koʻrgazmasining ochilishi boʻlib oʻtdi. Bu haqda «Dunyo» axborot agentligi xabar berdi.

Tadbir Oʻzbekistonning Saudiya Arabistonidagi elchixonasi tomonidan tashkil etilib, unda diplomatik korpus, davlat organlari, ommaviy axborot vositalari vakillari, madaniyat va sanʼat arboblari, rassomlar hamda boshqa mehmonlar jam boʻldi.

Dasturning asosiy voqeasi oʻzbek ustalarining milliy miniatyura rangtasviri tarixi, badiiy xususiyatlari va anʼanalarini aks ettiruvchi 35 ta asaridan iborat koʻrgazma boʻldi.

Oʻzbekiston elchisi Nodirjon Turgʻunov xalqlar oʻrtasidagi oʻzaro anglashuvni chuqurlashtirishda hamda Oʻzbekiston va Saudiya Arabistoni oʻrtasidagi gumanitar aloqalarni yanada rivojlantirishda madaniy almashinuvning ahamiyatini taʼkidladi.

«AlMashtal» ijodiy markazi rahbari, malika Nura bint Saud bin Naif Al Saud Oʻzbekistonni mustaqillikning 35 yilligi bilan tabrikladi. U, shuningdek, miniatyura sanʼatini islom badiiy merosining bir qismi sifatida asrab-avaylash muhimligini qayd etdi.

Kamoliddin Behzod nomidagi Sharq miniatyura sanʼati muzeyi direktori Gulabza Qarshiyeva Oʻzbekistonda miniatyura rangtasvirining tarixi va rivojlanishi haqida maʼlumot berdi. U mamlakatda ushbu sanʼat turini asrash, oʻrganish va yanada rivojlantirish borasida amalga oshirilayotgan chora-tadbirlar haqida gapirib, uning tarixiy xotira va madaniy anʼanalarni saqlashdagi rolini alohida taʼkidladi.

Koʻrgazmada namoyish etilgan asarlar tashrif buyuruvchilarga oʻzbek miniatyura rangtasvirining badiiy uslublari, mavzulari va eng mayda detallarga boʻlgan oʻziga xos eʼtiborini chuqurroq anglash imkonini berdi.

Tadbir doirasida taʼlim va sanʼat sohasidagi hamkorlik masalalari ham muhokama qilindi.

Saudiya universitetlari vakillari Kamoliddin Behzod nomidagi Milliy rassomlik va dizayn instituti bilan sheriklik aloqalarini oʻrnatishga qiziqish bildirdilar.

Hamkorlikning istiqbolli yoʻnalishlari qatoriga akademik almashinuvlar, qoʻshma tadqiqotlar va professional aloqalar kiradi.

Koʻrgazma tashrif buyuruvchilar uchun ikki kun davomida ochiq boʻladi.

Bundan tashqari, oʻzbekistonlik mutaxassislar 35 nafar saudiyalik havaskor rassom va yosh ustalar uchun amaliy mahorat darslari oʻtkazadilar.