Oʻzbekiston hududlarning sanoat xaritasini qayta tuzadi
Oʻzbekistonda hududlarning sanoat ixtisoslashuvi va eng yuqori salohiyatga ega hududlarni rivojlantirishga eʼtibor qaratish rejalashtirilmoqda. Har bir hudud uchun eng istiqbolli uchta tuman va uchta drayver tarmoqni belgilab olish asosiy vazifalardan biri boʻladi. Bu haqda Iqtisodiyot va moliya vazirligida boʻlib oʻtgan seminarda soʻz yuritildi. Ishtirokchilar hududiy sanoatni rivojlantirish va sanoat shtablari faoliyatini yangi bosqichga olib chiqish masalalarini muhokama qildilar. […]
Oʻzbekiston hududlarning sanoat xaritasini yangilamoqchi
Oʻzbekistonda hududlarning sanoat ixtisoslashuviga va eng katta imkoniyatlarga ega boʻlgan hududlarni rivojlantirishga eʼtibor qaratish rejalashtirilmoqda. Har bir hudud uchun eng istiqbolli uchta tuman va uchta drayver tarmoqni belgilab olish asosiy vazifalardan biriga aylanadi.
Bu haqda Iqtisodiyot va moliya vazirligida boʻlib oʻtgan seminarda soʻz yuritildi. Ishtirokchilar hududiy sanoatni rivojlantirish va sanoat shtablari faoliyatini yangi bosqichga olib chiqish masalalarini muhokama qildilar.
Istiqbolli hududlarni tanlashda nafaqat faoliyat koʻrsatayotgan korxonalar mavjudligi, balki hududning ixtisoslashuvi, xomashyo bazasi, infratuzilmasi, geografik joylashuvi va logistika imkoniyatlari ham hisobga olinadi. Bunday yondashuv muayyan tumanlarda qaysi turdagi ishlab chiqarishni rivojlantirish maqsadga muvofiq ekanligini aniqroq koʻrsatib berishi kerak.
Misol tariqasida Samarqand viloyati keltirildi. Seminar ishtirokchilarining baholashicha, bu yerda yuqori sanoat salohiyatiga ega hududlarni rivojlantirish yiliga qoʻshimcha 200–250 milliard soʻmlik mahsulot ishlab chiqarishni taʼminlashi, 2 mingdan ortiq ish oʻrni yaratishi va eksportni 50 million dollarga oshirishi mumkin.
Surxondaryo viloyatiga alohida eʼtibor qaratildi. Termiz, Jarqoʻrgʻon va Sherobod tumanlarini qurilish materiallari ishlab chiqarishga ixtisoslashtirish taklif etilmoqda. Istiqbolda viloyatni ushbu mahsulotlarni ishlab chiqarish va eksport qilish boʻyicha janubiy markazga aylantirish koʻzda tutilgan.
Bunda gap nafaqat mavjud korxonalarni kengaytirish haqida bormoqda. Tarmoqni rivojlantirish doirasida 300–400 million dollar investitsiya jalb etish hamda bazalt mahsulotlari, quruq qurilish qorishmalari, gipsokarton, keramika va temir-beton buyumlari ishlab chiqarishni koʻpaytirish rejalashtirilgan.
Yana bir yoʻnalish Oʻzbekistonda fazoviy-hududiy rejalashtirish amaliyotini joriy etish boʻldi. Bu infratuzilma, xomashyo, logistika va muayyan hududning xususiyatlarini hisobga olgan holda, qaysi sanoat obʼyektlarini qayerda joylashtirish maqsadga muvofiqligini oldindan aniqlashga yordam berishi taxmin qilinmoqda.
Hududlarning fazoviy strategiyalari va rejalarini tayyorlash uchun shaharsozlik sohasidagi xalqaro kompaniyalarni jalb etish rejalashtirilgan. Ularning xizmatlari Jahon bankining «Oʻrta shaharlar» loyihasi mablagʻlari hisobidan toʻlanadi.
Shu tariqa, hududlarning sanoat siyosatini nafaqat alohida investorlarni jalb qilish, balki hududlarni tizimli ixtisoslashtirish atrofida ham qurish koʻzda tutilgan. Vazirlikning hisoblashicha, bu tumanlarning sanoat salohiyatidan samaraliroq foydalanish, drayver tarmoqlarni rivojlantirish va muammoli korxonalar bilan manzilli ishlash imkonini beradi.