Oʻzbekiston fuqarosi Konnektikutda 12 million dollarlik yukni oʻgʻirlaganlikda ayblandi
Tashkent Times — Oʻzbekistonning eng soʻnggi yangiliklarini yoritib boruvchi ingliz tilidagi onlayn-gazetadir.
**Konnektikutda oʻzbekistonlik erkak 12 million dollarlik yukni oʻgʻirlaganlikda ayblandi**
Yuk tashish tizimidan 12 million dollardan ortiq qiymatdagi yuklarni oʻgʻirlaganlikda ayblanayotgan oʻzbekistonlik erkak chorshanba kuni Bridjportdagi federal sudga keltirildi va til biriktirish ayblovi boʻyicha oʻzini aybdor emas deb tan oldi.
Ushbu ish Nyu-Xeyvendagi federal katta hakamlar hayʼati tomonidan 22 sentyabr kuni 33 yoshli Nursulton Izzatulloyevich Xaydarovga nisbatan chiqarilgan ayblov xulosasidan soʻng boshlangan. Chil biriktirish moddasi boʻyicha aybi isbotlansa, uni maksimal ozodlikdan mahrum qilish jazosi kutmoqda — besh yilgacha qamoq.
Konnektikut okrugi boʻyicha AQSh prokurori hisobotida Xaydarov qoʻshilganlikda ayblanayotgan fitna tafsilotlari keltirilgan.
Sud hujjatlari va bayonotlari Milliy xavfsizlik operativ guruhi Kaliforniya va boshqa shtatlardagi obʼyektlardan sodir etilgan bir qator yuk oʻgʻirliklarini surishtirayotganini koʻrsatadi.
Tergovchilarning taʼkidlashicha, 2025 yilning sentyabr oyidan boshlab Xaydarov va uning ehtimoliy sheriklari bir nechta yuk tashuvchi kompaniyalarni sotib olishgan yoki boshqacha tarzda oʻz nazoratiga olishgan.
Soʻng ular kompaniyalarning AQSh Transport vazirligi raqamlarini, yuk tashuvchilarning identifikatsiya raqamlarini, elektron pochta hisoblarini va egalarining shaxsini qoʻlga kiritishgan.
Prokurorlarning aytishicha, ushbu shaxslar oʻzlarini sobiq egalar qilib koʻrsatishgan hamda shtatlararo yuk tashish boʻyicha shartnomalarni qoʻlga kiritish uchun mavjud biznesning obroʻsi va ishonchliligidan foydalanishgan.
Yuk brokeri shtatlararo yuk tashish boʻyicha shartnoma tuzgach, haydovchi taqsimlash punktidan yukni qabul qilib olgan.
Shunga qaramay, hisobotda aytilishicha, koʻplab yuklar manzilga yetkazilmagan va oʻgʻirlangan deb xabar qilingan. Baʼzi hollarda, ayblanayotgan jinoyatchilar oʻgʻirlangan tovarlarni qaytarish uchun tovon puli ham talab qilishgan.
Ayblov xulosasiga koʻra, Xaydarov AQShda qonuniy doimiy yashovchi boʻlgan va Nyu-Djersi shtati tomonidan berilgan haqiqiy tijorat haydovchilik guvohnomasiga ega boʻlgan.
Shuningdek, u «Sayid Maxmudarov», «Rustam Mavlonov», «Dmitriy Aganin», «Roman Smirov» va «Kayrat Nurtas» nomlariga rasmiylashtirilgan soxta haydovchilik guvohnomalariga ega boʻlgani aytilmoqda.
Prokurorlarning taʼkidlashicha, ushbu shaxsni tasdiqlovchi hujjatlarning har birida Xaydarovning yuz tuzilishi oʻzgartirilgan fotosurati boʻlgan.
Ushbu til biriktirish natijasida kamida 24 ta yuk partiyasi oʻgʻirlangani aytilmoqda.
Ushbu yuklar tarkibiga qattiq disklar, stereo uskunalar, kiyim-kechak, elektronika, kompter uskunalari, oziq-ovqat mahsulotlari, nikotin mahsulotlari va boshqa qimmatbaho tovarlar kirgan.
Taʼkidlanganidek, hisobotda aynan Xaydarov aloqador deyilgan oʻgʻirliklardan yetkazilgan zarar miqdori 12 million dollardan ortiq deb baholanmoqda.
Xaydarov 1 iyun kuni Kaliforniya shtatining Ontario shahrida federal jinoiy shikoyat asosida hibsga olingan. Oʻshandan beri u hibsda saqlanmoqda va chorshanba kuni sudda hozir boʻlish uchun Bridjportga olib kelindi.
Prokurorlar Xaydarovning aybi sudda oqilona shubhadan xoli tarzda isbotlanmagunicha, u aybsiz deb hisoblanishini taʼkidlamoqda.
Ushbu ish Federal qidiruv byurosi tomonidan AQSh Transport vazirligining Bosh inspektor ofisi, Ichki daromadlar xizmatining Jinoiy tergov boʻlimi, Milliy xavfsizlik tergovlari hamda Kaliforniya shtatining Fullerton va Ontario shaharlari politsiya boshqarmalari koʻmagida tergov qilinmoqda.