Oʻzbekiston davlat moliyasi qoʻriqchiligidagi 212 ta xavf-xatar: Iqtisodiyot va moliya vazirligi oʻz «zaif nuqtalari»ni xatlovdan oʻtkazdi

Oʻzbekiston davlat moliyasi nazorati ostidagi 212 ta xavf-xatar: Iqtisodiyot va moliya vazirligi oʻz «zaif nuqtalari»ni xatlovdan oʻtkazdi

Oʻzbekiston Iqtisodiyot va moliya vazirligida oʻz faoliyati bilan bogʻliq xavf-xatarlar xatlovdan oʻtkazildi. Idora axborot xizmatining xabar berishicha, 40 ta tarkibiy boʻlinma tomonidan 212 ta xavf-xatar aniqlanib, baholandi va ular yagona reyestrga kiritildi.

Bu ishlar Vazirlar Mahkamasining 2025 yil 29 apreldagi «Davlat moliyasi sohasida xavf-xatarlarni boshqarish tizimini samarali tashkil etish chora-tadbirlari toʻgʻrisida»gi qarori ijrosini taʼminlash maqsadida amalga oshirildi.

Baholash yakunlariga koʻra, vazirlikda vahimaga tushish uchun asos topilmadi — yuqori darajadagi xavf-xatarlar aniqlanmadi. Shu bilan birga, idora faoliyatini butunlay xavf-xatarsiz deb atab boʻlmaydi.

212 ta xavf-xatardan:

156 tasi yoki 73,6 foizi — past darajadagi;

56 tasi yoki 26,4 foizi — oʻrta darajadagi xavf-xatarlar toifasiga kiritildi; yuqori darajadagi xavf-xatarlar aniqlanmadi.

Bunda oʻrtacha xavf darajasi eng past baho 1,25 va eng yuqori baho 5,98 boʻlgan holda 2,65 ni tashkil etdi.

Eng katta ulushni operatsion xavf-xatarlar tashkil etdi — 67 ta yoki umumiy miqdorning qariyb uchdan bir qismi.

Keyingi oʻrinlarda: strategik — 44 ta; maʼmuriy — 42 ta; moliyaviy — 35 ta; korruptsiyaviy — 24 ta.

Boshqacha aytganda, vazirlik uchun yuzaga kelishi mumkin boʻlgan muammolar nafaqat moliya bilan bogʻliq. Xavf-xatarlarning sezilarli qismi tashkiliy jarayonlar, boshqaruv va idoraning kundalik faoliyati hissasiga toʻgʻri keladi.

Kelib chiqishiga koʻra ham xavf-xatarlar asosan ichki xususiyatga ega. 194 ta xavf ichki, 16 tasi tashqi deb tan olingan boʻlsa, yana 2 ta xavf bir vaqtning oʻzida ham ichki, ham tashqi omillarga tegishli deb topildi.

Oʻziga xos «xavf-xatarlar roʻyxati»ni tuzib chiqqan Iqtisodiyot va moliya vazirligi ularga nisbatan chora koʻrishni ham koʻzda tutdi: «zaif nuqtalar»ni kamaytirish, oldini olish va bartaraf etishga qaratilgan 58 ta tadbirdan iborat reja tasdiqlandi.