Oʻzbekiston aholisi yetti oyda taʼlimga qariyb 30 trillion soʻm sarfladi

Oʻzbekiston aholisi yetti oyda taʼlimga qariyb 30 trillion soʻm yoʻnaltirdi

2026 yilning yetti oyida Oʻzbekistonda taʼlim sohasidagi xizmatlar hajmi 27,2 trillion soʻmni tashkil etdi. Oʻtgan yilga nisbatan ushbu koʻrsatkich 18,4 foizga oʻsdi.

Milliy statistika qoʻmitasi maʼlumotlariga koʻra, barcha taʼlim xizmatlarining qariyb yarmi oliy taʼlim hissasiga toʻgʻri keladi. Uning ulushi umumiy hajmning 41,2 foizini tashkil etdi.

Koʻrsatilgan taʼlim xizmatlari hajmi boʻyicha Toshkent shahri hamon yetakchilik qilmoqda. Yetti oy davomida poytaxtda ushbu koʻrsatkich 14,5 trillion soʻmga yetdi — mamlakatdagi jami taʼlim xizmatlari hajmining yarmidan koʻpi poytaxt hissasiga toʻgʻri keldi.

Hududlar orasida eng yuqori koʻrsatkichlar Samarqand va Fargʻona viloyatlarida qayd etildi — 1,7 trillion soʻmdan. Keyingi oʻrinlarni Namangan va Andijon viloyatlari — 1,3 trillion soʻmdan, shuningdek, Toshkent viloyati 1,2 trillion soʻm koʻrsatkich bilan egalladi.

Buxoro viloyatida taʼlim xizmatlari hajmi 1,1 trillion soʻmni, Qashqadaryo viloyatida esa 972,7 milliard soʻmni tashkil etdi. Qoraqalpogʻistonda ushbu koʻrsatkich 771,7 milliard soʻmga yetdi.

Surxondaryoda yanvar–iyul oylarida 712,0 milliard soʻmlik, Xorazm viloyatida esa 694,1 milliard soʻmlik taʼlim xizmatlari koʻrsatildi. Navoiy viloyatida bu koʻrsatkich 423,9 milliard soʻmni tashkil etdi.

Hududlar orasida eng kam taʼlim xizmatlari Jizzax va Sirdaryo viloyatlarida koʻrsatildi — tegishlicha 361,8 milliard va 357,1 milliard soʻm.

2026 yilning birinchi yarim yilligida Oʻzbekiston tijorat banklari tomonidan umumiy qiymati 115,9 milliard soʻmlik imtiyozli taʼlim kreditlari ajratildi.