Oʻsmir roker Nene Royal «America's Got Talent» shousida gʻolib chiqqan ilk tailandlik boʻldi
Uning xevi-metal yoʻnalishidagi chiqishi qolgan toʻqqiz nafar finalchini, jumladan, fokuschilar va hatto robotlar jamoasini ham ortda qoldirdi.
Oʻsmir roker Nene Royal America's Got Talent shousida gʻolib chiqqan ilk tailandlik boʻldi
Nene tanlovning dastlabki bosqichlaridanoq tomoshabinlarning sevimli ishtirokchisiga aylandi
16 yoshli roker Nene Royal America's Got Talent shousining eng yangi gʻolibi deb eʼlon qilindi va ushbu uzoq yillik isteʼdodlar tanlovida gʻolib chiqqan ilk tailandlik boʻldi.
Seshanba kuni Kaliforniyada boʻlib oʻtgan finalda asl ismi Rattikarn Amloy boʻlgan Nene Amerikaning The White Stripes rok duetining Seven Nation Army qoʻshigʻini kuyladi.
Uning xevi-metal yoʻnalishidagi chiqishlari qolgan toʻqqiz nafar finalchini, jumladan, illyuzionist, itlar bilan chiqish qilgan ijrochilar va hatto robot raqs guruhini ortda qoldirdi.
Tailandda koʻpchilik uning gʻalabasini bayram qilmoqda, baʼzilar uning «dunyodagi eng yirik sahnalardan biriga» chiqqanidan faxrlanishini aytmoqda. Tailand hukumati uni «katta orzular qilishga jurʼat etgan har bir kishi uchun ilhom manbai» deb atadi.
Nene oʻz kastingidan olingan viral videodan soʻng tezda muxlislarning sevimlisiga aylandi. Unda u hayratda qolgan hakamlar hayʼati qarshisida The Cranberries guruhining Zombie qoʻshigʻini yuksak mahorat bilan ijro etgan edi. Ushbu video hozirgacha 20 million marta koʻrildi.
Chorshanba oqshomida, natijalar eʼlon qilinishidan oldin, Nene Linkin Park guruhi bilan sahnaga chiqib, Amerika guruhining 2024 yildagi The Emptiness Machine rok qoʻshigʻini birgalikda ijro etdi.
Oʻsha oqshom kechroq, shouning 21-mavsumi gʻolibi deb eʼlon qilinganidan soʻng, u yerga tiz choʻkib yigʻlab yubordi. Gʻoliblik uchun 1 million dollar (755 000 funt sterling) miqdoridagi mukofot koʻzda tutilgan.
«Hozir juda xursandman va hayajondaman», dedi u oʻzini qoʻllab-quvvatlagan barchaga minnatdorchilik bildirib.
Natijalar eʼlon qilinadigan dasturni Tailanddagi koʻplab muxlislari ham diqqat bilan kuzatib borishdi, chunki ular NBC telekanalidagi jonli efirni tomosha qila olishmasdi.
Tailanddagi koʻpchilik YouTube'dagi jonli translyatsiyaga ulanishga majbur boʻldi va natijalar eʼlon qilinayotgan vaqtda efir toʻsatdan uzilib qolganida xavotirga tushishdi.
Biroq bir necha daqiqadan soʻng, Nenening tarixiy gʻalabasi haqidagi xabar tarqalgach, yengil tortishdi va xursandchilik qilishdi.
«Tarix yaratildi!» deb yozdi tailandlik ijtimoiy tarmoq foydalanuvchilaridan biri Facebook'da.
«Dunyo yozib qoʻysin, bu tailandlik bola aql bovar qilmaydigan darajada isteʼdodli», deb yozdi boshqasi.
16 yoshli Nene Royal oʻzining xevi-metal chiqishlari bilan internetda mashhur boʻlib ketdi
«Bu gʻalabani oʻziga xos qiladigan jihat shundaki, Nene oʻz tailandlik oʻzligini dunyoning eng yirik sahnalaridan biriga ishonch bilan olib chiqdi», deyiladi Tailand hukumati jamoatchilik bilan aloqalar departamentining payshanba kungi bayonotida.
«U isteʼdod, mehnat va qatʼiyat har qanday joydan, jumladan, Pxuketdan kelgan gitara va katta orzuga ega yosh qizdan ham chiqishi mumkinligini koʻrsatdi».
Nenening soʻzlariga koʻra, u yetti yoshidan gitara chalishni boshlagan va gastrollarda yuradigan musiqachi boʻlishni orzu qilgan.
Oʻzining tugʻilib oʻsgan shahri — sohillari va dengiz boʻyidagi kurortlari bilan mashhur boʻlgan sayyohlik maskani Pxuketda Nene Naka Weekend Market bozorida koʻcha musiqachisi sifatida tanilgan edi.
Pxuketlik 43 yoshli gid Piyarat Na Songxla BBC'ga Nene Royalning chiqishlarini bolaligidan beri kuzatib kelganini aytdi.
«U juda shirin qiz», deydi u. «Men u uchun juda xursandman va hayajondaman. Uning bu qadar uzoqqa borganiga ishonish qiyin. U bilan juda faxrlanaman».
Naka Weekend Market бозорининг Facebook'dagi sahifasida uning gʻalabasidan soʻng Nenega bagʻishlangan post joylashtirildi.
«Naka Market'dagi har bir kishi sening dunyoning eng yirik sahnalaridan birida porlayotganingni koʻrishdan faxrlanadi», deyiladi postda.
«Sening isteʼdoding, qalbing va jasorating juda koʻp odamlarni ruhlantirdi va bu gʻalaba inson oʻz orzusiga chin dildan bor vujudini bagʻishlaganida nimalar sodir boʻlishi mumkinligini goʻzal tarzda eslatib turadi».
Nene tahsil oladigan Pxuketdagi Kajonkiet xalqaro maktabi ham uni gʻalaba bilan tabrikladi.
«Biz sen bilan juda faxrlanamiz», deyiladi maktabning Facebook'dagi postida. Unda oʻquvchilar va xodimlar Nenening final chiqishini tomosha qilish uchun yigʻilib, uning ismini aytib baqirayotgani aks etgan video ham ulashilgan.