Nyu-York shahrida ICE agenti bir kishini otib qoʻydi
Nyu-York meri Milliy xavfsizlik vazirligi «jinoyatchi noqonuniy muhojir»ni hibsga olish chogʻida sodir boʻlganini maʼlum qilgan otishmadan gʻazabda ekanini bildirdi.
Nyu-Yorkda ICE agenti bir kishini otib qoʻydi
Payshanba kuni Nyu-York shahrining Bronks mavzesida AQSh Immigratsiya va bojxona nazorati (ICE) agenti bir kishini otib qoʻydi.
Ushbu idora faoliyatini nazorat qiluvchi Milliy xavfsizlik departamenti (DHS) maʼlum qilishicha, ICE xodimi «jinoyatchi noqonuniy muhojirni hibsga olish boʻyicha maqsadli tezkor tadbir» davomida «qurolidan oʻq uzgan».
Departament bayonotida aytilishicha, ushbu shaxs tirik va mahalliy shifoxonada davolanmoqda.
Nyu-York meri Zohran Mamdani buni «vijdonga zid va nihoyatda jiddiy vaziyat» deb atadi.
«Dastlabki maʼlumotlarga koʻra, agentlar oʻq uzishdan oldin uni va mashinasidagi besh yoshli bolani qurshab olishgan. Bolaga jismoniy shikast yetmagan deb hisoblaymiz», dedi u.
Payshanba kuni kechqurun Nyu-York gubernatori Keti Xokul prezident Donald Tramp bilan otishma haqida gaplashganini va «Nyu-York ahli nomidan gʻazab» bildirganini aytdi.
«Men, shuningdek, faktlarni aniqlashimiz va haqiqatga yetishimiz uchun otishma tasvirlangan har qanday bodi-kamera tasvirlari jamoatchilikka taqdim etilishini soʻradim».
Tramp hozircha otishma boʻyicha ommaviy bayonot bergani yoʻq.
DHS maʼlumotlariga koʻra, shaxsi rasmiylar tomonidan oshkor etilmagan ushbu kishi Dominikan Respublikasidan boʻlib, «ilgari yirik hajmdagi oʻgʻrilik uchun jinoiy javobgarlikka tortilgan, shuningdek, tan jarohati yetkazish, talonchilik, giyohvand moddalar va qurol saqlash boʻyicha bir necha bor hibsga olingan».
DHS bayonotiga koʻra, u 2023 yil dekabr oyida Nyu-Yorkda politsiya xodimlari tomonidan hibsga olingan va «bir necha kundan keyin» qoʻyib yuborilgan.
Shuningdek, u AQSh Adliya vazirligi tomonidan transmilliy jinoiy guruh sifatida tavsiflangan «Trinitarios» guruhiga aloqador boʻlgani aytilmoqda.
Mamdani, shuningdek, Trampdan shaharda ICE tomonidan amalga oshiriladigan huquqni muhofaza qilish harakatlarini toʻxtatishni soʻrashini aytdi.
«ICE agentlari jamoalarimizni dahshatga solayotgan bir paytda men tomoshabin boʻlib turmayman», deb yozdi u payshanba kuni kechqurun X ijtimoiy tarmogʻida.
Demokratlarning tayanch nuqtasi boʻlgan Nyu-York AQShning oʻz politsiya xodimlariga federal immigratsiya nazoratiga yordam berishni taqiqlovchi bir nechta shaharlaridan biridir.
Payshanba kuni kechqurun voqea joyiga bir guruh namoyishchilar yigʻilib, «biz adolat istaymiz» va «ICE hoziroq koʻchalarimizdan yoʻqolsin» deb hayqirishdi.
Joriy yilda ICE xodimlari ishtirokida bir nechta shov-shuvli otishmalar yuz berdi, jumladan, yanvar oyida Minneapolisda Rene Gudning oʻlimiga sabab boʻlgan otishma shular jumlasidandir.