NYT MRB rahbarining Moskvaga sirli tashrifi tafsilotlarini ochiqladi
AQSh Markaziy razvedka boshqarmasi (MRB) direktori Jon Retkliff Moskvaga tashrifi chogʻida Rossiya Federal xavfsizlik xizmati (FXX) rahbari Aleksandr Bortnikovga Rossiyaning Ukrainadagi urushdagi holati boʻyicha «pessimistik bahosi»ni yetkazgan. U Moskvani harbiy va iqtisodiy vaziyat yanada yomonlashmasidan oldin muzokaralarni boshlashga chaqirgan. Bu haqda The New York Times (NYT) amaldagi va sobiq amerikalik rasmiylarga tayanib xabar berdi.
NYT MRB rahbarining Moskvaga maxfiy safari tafsilotlarini oshkor qildi
Nashrning xabar berishicha, Jon Retkliff 25 avgust kuni Moskvada Bortnikov bilan uchrashgan. Baʼzi manbalar FXX rahbarining vositachi sifatida tanlanishini Rossiya prezidenti Vladimir Putinning maxsus xizmatlardagi oʻtmishi bilan izohlagan.
Ularning fikricha, Putin MRB direktori orqali yetkazilgan maʼlumotlarni odatiy diplomatik kanallardan kelgan axborotga nisbatan ishonchliroq qabul qilishi mumkin.
NYT Retkliff va Bortnikov oʻrtasida boshqa aloqa kanallaridan mustaqil ravishda ishlaydigan toʻgʻridan-toʻgʻri muloqot kanali mavjudligini ham qayd etgan.
**MRB Rossiya armiyasining yoʻqotishlariga eʼtibor qaratgan**
Gazetaga koʻra, MRB xodimlarida Putinga Ukrainadagi urushning haqiqiy borishi va Rossiya armiyasi yoʻqotishlari koʻlami haqida toʻliq va ishonchli maʼlumot yetkazilayotganiga shubha bor.
NYT Retkliff Bortnikovga yetkazgan xabarning aniq mazmunini ochiqlamagan. Biroq uning asosiy mazmuni MRB direktori avvalroq omma oldida bildirgan ayrim fikrlarga mos kelishi taʼkidlangan.
Xususan, Retkliff iyul oyida soʻnggi bir yarim yil davomida Rossiya Ukraina hududining atigi 1 foizga yaqin qismini egallaganini aytgan edi. U buni Ukraina Qurolli kuchlarida uchuvchisiz uchish apparatlari sohasi jadal rivojlangani bilan izohlagan.
Shuningdek, MRB direktori Rossiya harbiylarining frontdagi yoʻqotishlari juda yuqori ekani haqida ham gapirgan.
Biroq NYT maʼlumotiga koʻra, Retkliff Bortnikov bilan uchrashuvda, agar Putin AQSh tomonidan yetkazilgan xabarni inobatga olmasa va harbiy harakatlarni toʻxtatmasa, qanday oqibatlar yuz berishi mumkinligi haqida tahdid bildirmagan.
MRB rahbari Moskvadagi uchrashuvdan oldin Ukraina vakillari bilan ham muloqot qilgan. U Kiyev tomoniga tashrifdan maqsad Moskva pozitsiyasini oʻrganish ekanini, Ukraina nomidan Rossiya bilan qandaydir yon berishlarni kelishish emasligini bildirgan.
**Retkliffning Moskvaga tashrifi maqsadi boʻyicha turli versiyalar bor**
Jon Retkliff 25 avgust kuni AQSh Harbiy-havo kuchlarining Boeing C-17 Globemaster III harbiy-transport samolyotida Rossiyaga kelgan va bir necha soatdan soʻng mamlakatni tark etgan.
The Washington Post tashrif maxsus xizmatlar oʻrtasidagi aloqalar bilan bogʻliq boʻlganini yozgan.