Nvidia rahbari sunʼiy intellekt tufayli insoniyatning qirilib ketishi haqidagi xavotirlarni «qiyomat kuni haqidagi uydirmalar» deb rad etdi
Djensen Xuangning bu fikrlari sunʼiy intellekt boʻyicha tadqiqotchilarning ushbu texnologiya insoniyatning yoʻq boʻlib ketishiga olib kelishi mumkinligi haqidagi ogohlantirishlaridan keyin yangradi.
Nvidia rahbari Jensen Xuang sunʼiy intellekt yaqin oʻn yil ichida insoniyatni yoʻq qilib yuborishi mumkinligi haqidagi ogohlantirishlarni rad etib, ularni «qiyomat kuni haqidagi uydirmalar» deb atadi.
«2030 yil dunyoning oxiri boʻlmaydi. Bu dunyoning oxiri boʻlishi ehtimoli 0 foizga teng», — dedi Xuang BBC’ning AQShdagi hamkori boʻlgan CBS News telekanaliga bergan intervyusida.
U qoʻshimcha qildi: «Odamlarni qoʻrqitishning hojati yoʻq. Bu masʼuliyatsizlikdir».
Tadqiqotchilar ushbu texnologiyaning ehtimoliy xavf-xatarlari haqida bong urganidan soʻng, soʻnggi haftalarda sunʼiy intellekt xavfsizligi boʻyicha bahs-munozaralar kuchaydi, bu esa sohaning ayrim yetakchilarini modellarni ishlab chiqishni sekinlashtirishga chaqirishga undadi.
Xuangning bu izohlari Anthropic kompaniyasining sobiq tadqiqotchisi Jeykob Kokson ijtimoiy tarmoqlarda sunʼiy intellekt dasturchilari ushbu texnologiya «oʻn yillikning oxirigacha barchamizni oʻldirishi mumkin» deb hisoblashi haqida yozganidan keyin yangradi.
Koksonning fikrlari sunʼiy intellekt xavf-xatarlari haqidagi muhokamalarga sabab boʻldi, jumladan, Anthropic rahbari Dario Amodei va OpenAI rahbari Sem Altman kabi yetakchi rahbarlar sunʼiy intellektni rivojlantirish surʼatini pasaytirishga chaqirishdi.
Xuang bu bashoratlar «ilm-fanga asoslanmagan»ini aytdi va Nvidia kompaniyasi soha oʻz mahsulotlarini masʼuliyat bilan ishlab chiqishini taʼminlash uchun barcha asoslarga ega ekanligini taʼkidladi.
«Kompaniyamizning muvaffaqiyati mahsulot va xizmatlarning xavfsiz joriy etilishi bilan bevosita bogʻliq», — dedi u. «Agar biz buni davom ettirmasak, qadrimiz pasayadi».
U shuningdek, «sekinlashish» haqida gapirayotgan sunʼiy intellekt kompaniyalari oʻz mahsulotlari yetkazishi mumkin boʻlgan har qanday zarar uchun javobgarlikdan himoyalanish yoʻllarini izlayotgan boʻlishi mumkinligini taxmin qildi.
«Satrlar orasini oʻqing», — dedi u. «Ular aslida koʻproq qonunlar qabul qilinishini soʻrashayotgani yoʻq. Ular mavjud qonunlardan ozod qilinishni soʻrashmoqda va menimcha, bu muammodir».
Nvidia sunʼiy intellekt modellarini yaratish uchun zarur boʻlgan ilgʻor kompyuter chiplarini ishlab chiqaruvchi ushbu sohadagi yirik kuch hisoblanadi.
Oʻtgan haftada Xuang Qirol Charlz mezbonlik qilgan Buyuk Britaniya sammitida ishtirok etdi. Qirol texnologiya yetakchilarini sunʼiy intellektning «ekzistentsial xavflari» haqida ogohlantirgan edi.
«Sizning oldingizda turgan vazifa nafaqat texnologiyani rivojlantirish, balki uning insoniyat, jamiyat va tabiat olamiga qatʼiy xizmat qilishini taʼminlashdir», — dedi Qirol guruhga qarata.
AQShda esa Prezident Donald Tramp sunʼiy intellekt xavflari haqidagi xavotirlarni ahamiyatsiz deb hisobladi.
Tramp 14 sentyabr kuni Los-Anjelesdagi texnologik konferentsiyada Nvidia rahbari sahnada boʻlgan vaqtda Xuangga kutilmaganda telefon qildi.
Suhbat davomida Tramp sunʼiy intellektni rivojlantirish surʼatini sekinlashtirish haqidagi chaqiriqlarni tanqid qildi va bu xavotirlarni «uydirma» deb rad etdi.