Nozik ekotizim ostida gaz quvuri tunneli barpo etildi
Kanadada Eagle Mountain - Woodfibre gaz quvuri uchun Monmut togʻi va Skomish daryosi estuariyi ostidan qazilgan 9 kilometrlik tunnelning ikki qismi tutashtirildi. Endi tunnel quvurlarni oʻrnatishga tayyorlanadi.
Nozik ekotizim ostida gaz quvuri tunneli qurildi
Kanadada Kokitlam shahrini Woodfibre LNG eksport terminali bilan bogʻlaydigan Eagle Mountain - Woodfibre (EGP) gaz quvuri qurilishi davom etmoqda.
Mutaxassislar loyihaning muhim bosqichini yakunlab, Monmut togʻi va Skomish daryosi estuariyi — daryoning dengizga quyilish hududi ostidan oʻtgan 9 kilometrlik tunnelning ikki qismini tutashtirdi.
Tunnel ikki xil geologik muhitda qazildi. Monmut togʻi ostida qattiq togʻ jinslari, estuariy ostida esa yumshoq grunt mavjud edi.
Ikki qismni ajratib turgan soʻnggi qatlam tunnel qazish kompleksi yordamida qisqa vaqt ichida ochildi. Biroq mutaxassislar ushbu bosqichga yetib kelish uchun bir necha yil tayyorgarlik koʻrgan.
Qurilish ekologik jihatdan sezgir hududga taʼsir qilishi mumkin edi. Shu sababli EGP loyihasi jamoasi ishlarni boshlashdan oldin ularni Skomish tub aholisi vakillari bilan kelishgan.
Britaniya Kolumbiyasi janubiy sohilida joylashgan Skwelwilʼem qoʻriqlanadigan estuariy hududi koʻplab oʻsimliklar, baliqlar va yovvoyi hayvonlarning yashash muhiti hisoblanadi. Ushbu hudud Skomish xalqi uchun ham muhim ahamiyatga ega.
Estuariy yuzasiga zarar yetkazmaslik uchun tunnelni ochiq transheya qazimasdan, uning ostidan oʻtkazishga qaror qilingan. Bu mavjud gaz tizimini kengaytirish bilan birga tabiiy hududni saqlab qolish imkonini bergan.
Loyihani texnik jihatdan amalga oshirish uchun ikkita turli tunnel qazish tizimi ishlab chiqildi. Ulardan biri estuariy ostidagi yumshoq gruntda, ikkinchisi Monmut togʻi ostidagi qattiq jinslarda ishladi.
Tunnel qurilishi EGP loyihasining eng murakkab qismlaridan biri hisoblangan.
Endi mutaxassislar tunnel qazish kompleksini olib chiqishi va inshootni gaz quvurlarini oʻrnatishga tayyorlashi kerak.