Norvegiya qirolining ahvoli og‘irlashdi
Norvegiya qiroli Haraldning sog‘lig‘i yomonlashdi
AP News xabariga ko‘ra, Norvegiya qiroli Haraldning salomatligi o‘tgan dam olish kunlari yomonlashgan. Bu haqda qirol saroyi ma’lum qildi.
89 yoshli monarx bir necha haftadan beri kasalligi tufayli ta’tilda edi. U bir hafta avval Milliy kasalxonaga yotqizilgan. Yevropadagi eng keksa monarx qonning bakterial infeksiyasi sababli antibiotiklar bilan davolanmoqda.
Qirol saroyining 23-avgust kuni kechqurun xabar berishicha, unga qo‘llanilayotgan muolajalar ijobiy ta’sir ko‘rsatmoqda va ahvoli barqaror deb baholanmoqda. Hozirda uning o‘g‘li, valiahd shahzoda Haakon qirol o‘rniga vaqtincha davlatni boshqarib turibdi.
O‘tgan haftada saroy qirolning gemolitik anemiya bilan og‘riyotganini va kortizon bilan davolanganini ma’lum qilgan edi. Natijada organizmda suyuqlik yig‘ilib qolgani sababli kasalxonaga yotqizishga to‘g‘ri kelgan. 1991-yildan beri taxtda o‘tirgan qirol Harald so‘nggi yillarda bir necha bor kasalxonaga tushgan.
Avvalroq AQSH sobiq prezidenti Jo Baydenning prostata bezi saratoni tanasiga tarqab ketgani va ahvoli sezilarli darajada og‘irlashgani haqida xabar berilgandi. Uning o‘g‘li Hanter Baydenning aytishicha, otasi kuchli og‘riqdan azob chekmoqda.