NKMK konida avtoagʻdargich shinasi portlashi oqibatida 2 kishi halok boʻldi
Hodisa 10-sentabr kuni Navoiy kon-metallurgiya kombinatining “Qizilqum” kon boshqarmasi tarkibidagi Pistali konida sodir boʻlgan. Halok boʻlgan ishchilardan tashqari yana bir necha kishi turli darajada tan jarohati olgani aytilmoqda.
NKMK konida avtoagʻdargich shinasi portlashi oqibatida 2 kishi halok boʻldi
Navoiy kon-metallurgiya kombinati da yana insonlar oʻlimi bilan bogʻliq noxush hodisa yuz berdi.
Maʼlum qilinishicha, 10-sentabr kuni NKMKning “Qizilqum” kon boshqarmasi tarkibidagi Pistali konida avtoagʻdargich shinasi portlab ketgan. Hodisa oqibatida ikki ishchi halok boʻlgan. Shuningdek, yana bir necha kishi turli darajada tan jarohati olgan.
NKMK hozircha holat yuzasidan rasmiy munosabat bildirmadi.
Bu kombinatda soʻnggi 2 oy ichida insonlar oʻlimi bilan bogʻliq ikkinchi hodisa: 21-iyul kuni Muruntov konida avtoagʻdargich yengil avtomobilni bosib, ezib oʻtib ketgan va buning oqibatida 2 nafar ishchi hodisa joyida halok boʻlgandi.
Nurota tumanida joylashgan Pistali konida birinchi portlatish ishlari 2023-yilda amalga oshirilgan.
Konda togʻ jinslari asosan 55, 90 tonna yuk koʻtarish quvvatiga ega boʻlgan Komatsu rusumli avtoagʻdargichlarda tashiladi.