Nilufar Allabergenova Yakkasaroy tumani hokimi lavozimidan ozod etildi
Nilufar Allabergenova Yakkasaroy hokimi lavozimidan ozod etildi. U tumanni 2023-yilning oktabridan buyon boshqarib kelayotgandi va poytaxt tumanlari hokimi lavozimidagi ilk ayol bo‘lgan. Gazeta ma’lumotlariga ko‘ra, uning o‘rnini Sergeli hokimining 39 yoshli birinchi o‘rinbosari Akmal Jumaboyev egallashi mumkin.
Nilufar Allabergenova Yakkasaroy tumani hokimi lavozimidan ozod etildi
Nilufar Allabergenova boshqa ishga o‘tishi sababli Toshkent shahri Yakkasaroy tumani hokimi lavozimidan bo‘shatildi. Bu haqda Gazeta`ga poytaxt hokimligi axborot xizmati ma’lum qildi.
Hozircha uning lavozimdan ozod etilishiga nima sabab bo‘lgani ochiqlanmagan.
Gazeta manbasiga ko‘ra, 15-oktabr kuni kechqurun Sergeli tumani hokimining moliya, iqtisodiyot va kambag‘allikni qisqartirish masalalari bo‘yicha birinchi o‘rinbosari bo‘lib ishlayotgan Akmal Muradovich Jumaboyev nomzodi Yakkasaroy tumani hokimi lavozimiga ko‘rib chiqiladi. Uning nomzodi xalq deputatlari tuman kengashi tomonidan tasdiqlanishi lozim.
Nilufar Anvarovna Allabergenova 2023-yil 9-oktabrda Yakkasaroy tumani hokimi etib tayinlangan edi.
U Toshkent tumanlaridan biriga hokim etib tayinlangan ilk ayol bo‘lgan.
Allabergenova 1971-yilda Toshkent shahrida tug‘ilgan. 1995-yilda Toshkent davlat yuridik institutini bitirgan.
Turli yillarda poytaxtning Yashnabod, Chilonzor va Mirzo Ulug‘bek tumanlari prokurori o‘rinbosari lavozimlarida ishlagan.
Akmal Jumaboyev 1987-yil 14-noyabrda Toshkent viloyatining Parkent tumanida tug‘ilgan. Toshkent avtomobil yo‘llari institutini tamomlagan.
U avval Yoshlar ittifoqi Toshkent shahar kengashiga rahbarlik qilgan, tashkilot Markaziy kengashi raisining birinchi o‘rinbosari, keyin esa raisi lavozimlarida faoliyat yuritgan.
2021-yil aprel oyida Sergeli tumani hokimining moliya, iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlangan va ushbu lavozimda besh yildan ortiq ishlagan.
Shuningdek, Toshkent shahri Mirzo Ulug‘bek tumani xalq deputatlari kengashi deputati bo‘lgan.