Nikolas Maduroning AQSHdagi hibsxonadan ilk suratlari e’lon qilindi
Nikolas Maduroning AQSH qamoqxonasidan ilk suratlari e’lon qilindi
Venesuelaning sobiq prezidenti Nikolas Maduroning AQSHdagi qamoqxona ichidan olingan dastlabki suratlari e’lon qilindi. U yanvar oyida Venesueladan olib ketilganidan beri Nyu-Yorkning Bruklin tumanidagi federal muassasada saqlanmoqda. Bu haqda al-Jazeera xabar berdi.
Suratlarda Maduro kulrang sport kiyimida tasvirlangan bo‘lib, ikki qo‘li bilan "V" ishorasini ko‘rsatmoqda. Sobiq prezidentning hibsga olinganidan beri sezilarli darajada vazn yo‘qotgani ko‘rinadi.
Maduro suratlarni yakshanba kuni X va Telegram sahifalarida e’lon qildi. U ispan tilida shunday yozgan: "Men bu suratlarni barcha nabiralarimga, barcha o‘g‘il-qizlarga va bizni yaxshi ko‘radigan barcha yaxshi insonlarga kichik sovg‘a sifatida yuboryapman".
Shuningdek, u qat’iyat bilan turishini ta’kidlab, Yaratganning yo‘l ko‘rsatishiga ishonch bildirgan. "Shuni bilishingizni istaymanki, biz qat’iyat bilan turibmiz, qalblarimiz sizning mehringizga to‘la. Biz kuchli, xotirjam va ishonch bilan qolamiz. Yaratgan biz bilan, u yo‘l ko‘rsatadi. Venesuela yana yuksaladi", deya qo‘shimcha qilgan Maduro.
Suratlardagi vaqt belgilari ularning 25-iyun kuni olinganini ko‘rsatadi. Bu sana Venesuelaning shimolida 6,5 mingdan ortiq odamning hayotiga zomin bo‘lgan va katta vayronagarchiliklarni keltirib chiqargan 7,5 va 7,2 magnitudali zilzilalar sodir bo‘lgan kunning ertasiga to‘g‘ri keladi.
AFP agentligi suratlarning haqiqiyligi va ularni e’lon qilishga qamoqxona ma’muriyati tomonidan ruxsat berilgan-berilmaganini aniqlash uchun muassasa bilan bog‘lanishga uringan. Biroq agentlik hozircha javob olmagan.
Maduroning ushbu xabari uning o‘rniga vaqtinchalik prezident sifatida kelgan Delsi Rodriges AQSH bilan tarixiy neft kelishuviga erishilganini ma’lum qilganidan ikki kun o‘tib e’lon qilindi. Kelishuv AQSH kompaniyalariga Venesueladagi neft konlarida faoliyat yuritish imkonini beradi.
Sobiq prezident hibsxonada gazeta va internetdan foydalana olmaydi. Biroq unga oila a’zolari va advokatlari bilan telefon orqali oyiga taxminan 300 daqiqa gaplashishga ruxsat berilgan. Bir qo‘ng‘iroq 15 daqiqadan oshmasligi kerak.
Maduro va uning rafiqasi Silia Flores AQSHda giyohvand moddalar savdosi hamda qurol saqlashda ayblanmoqda. Ular mazkur ayblovlarni rad etmoqda. AQSH federal sudi ma’lumotlariga ko‘ra, Maduro va Floresning sud jarayoni 2027-yil 1-iyunda boshlanishi kutilmoqda.