Netanyaxuning o‘g‘li AQSHdan Isroilga evakuatsiya qilindi
Netanyaxuning o‘g‘li AQSHdan Isroilga evakuatsiya qilindi
Isroil bosh vazirining o‘g‘li AQSHdan Isroilga shoshilinch ravishda evakuatsiya qilindi, bunga jiddiy xavf sabab bo‘lgan. Bu ma’lumotni shanba, 29-avgust kuni Isroilning Umumiy xavfsizlik xizmati (SHABAK) tasdiqladi.
Maxsus xizmat bayonotida aytilishicha, "Yair Netanyaxuga chindan ham jiddiy xavf tahdid solayotgan edi. Ushbu xavfni hisobga olgan holda, vaziyatni baholash natijalariga ko‘ra, uni qo‘riqlash guruhi bilan birgalikda zudlik bilan Isroilga qaytarish haqida qaror qabul qilindi".
AQSHning Newsmax nashri huquq-tartibot idoralaridagi manbasiga tayanib xabar berishicha, Isroil razvedkasi 2025-yil oxiridayoq Floridada Yair Netanyaxuni yo‘q qilish bo‘yicha Eronning suiqasd rejasini fosh qilgan va bu haqda Amerika rasmiylarini ogohlantirgan. Nashr ma’lumotiga ko‘ra, eronlik agentlar Mayamida bo‘lib, Netanyaxuning o‘g‘li yashash joyi va harakatlarini kuzatib kelgan.
Manbaning xabar qilishicha, doimiy ravishda isroillik qo‘riqchilar hamrohlik qiladigan bosh vazirning o‘g‘liga yashash joyini darhol tark etish buyurilgan. U hatto shaxsiy buyumlarini ham olmay, shoshilinch ravishda Isroilga qaytib kelgan va hozirda o‘sha yerda yashamoqda.
O‘tgan payshanba kuni Isroil hukumati rahbarining o‘ziga nisbatan ham Eron Milliy xavfsizlik oliy kengashi kotibi tahdidlar bilan chiqqan edi. "Biz sionistlar rejimi bosh vaziri Binyamin Netanyaxuni do‘zaxga jo‘natamiz", degandi Mohsin Rizoiy dpa agentligi tarqatgan intervyusida.
Avvalroq Isroil bosh vaziri Binyamin Netanyaxuning o‘g‘li Yair Netanyaxu ism-familiyasini Yonatan Honga o‘zgartirgani haqida xabar berilgandi.