Netanyaxu Britaniyani “yadro quroliga ega birinchi Islom Respublikasi” deb atadi

Isroil Bosh vaziri Binyamin Netanyaxu Buyuk Britaniyani "yadro quroliga ega bo‘lgan birinchi Britaniya Islom Respublikasi" deb atadi. Bu haqda The Guardian xabar berdi.

Netanyaxu Isroil armiya radiosiga bergan intervyusida ushbu fikrlarni bildirib, o‘ng qanot kuchlarning Britaniyadagi musulmon ozchilikka nisbatan islomofobik qarashlarini takrorladi.

U yarim asr avval jurnalist Rendolf Cherchill, ya’ni sobiq bosh vazir Uinston Cherchillning o‘g‘li Isroilni ijobiy yoritganini eslab, shunday dedi: "Buni bugungi Britaniyadan, ya’ni Britaniya Islom Respublikasi deb atalayotgan joydan izlab ko‘ring-chi".

Boshlovchi Netanyaxuning so‘zlariga e’tiroz bildirmadi, aksincha, u bosh vazirdan Buyuk Britaniyaga nisbatan adolatsiz yondashmayotganini so‘rab, "Butun Yevropa shunday emasmi?" deya savol berdi. Netanyaxu o‘z fikrida qat’iy turib javob berdi: "Ha, lekin bilasizmi, kimdir birinchi yadroviy qurolga ega bo‘lgan Islom Respublikasi bu Britaniya Islom Respublikasi bo‘ladi degan edi".

Ma’lumot uchun, rasman Pokiston Islom Respublikasi deb ataladigan Pokiston 1990-yillardan beri yadro quroliga ega.

So‘nggi oylarda Buyuk Britaniya va Isroil o‘rtasidagi munosabatlar, ayniqsa, Endi Bernxem Buyuk Britaniya bosh vaziri lavozimiga kelganidan beri tobora taranglashib bormoqda. U bosh vazir bo‘lishidan sal avval Leyboristlar partiyasining Isroilning G‘azodagi harbiy harakatlariga dastlabki munosabati uchun uzr so‘ragan edi. Bernxem partiya to‘g‘ri yo‘l tutmaganini va uning rahbarligida yaxshiroq harakat qilishi kerakligini aytib, Britaniyaning Yaqin Sharq bo‘yicha yondashuvida jiddiy o‘zgarish bo‘lishiga ishora qilgan. Iyun oyida u Isroil hukumatiga bosim o‘tkazish uchun ko‘proq ish qilishini, jumladan, jismoniy va yuridik shaxslarga nisbatan qo‘shimcha sanksiyalar kiritish hamda noqonuniy aholi punktlari bilan mahsulot savdosini taqiqlash ehtimoli borligini ma’lum qilgan.

AQSH vitse-prezidenti Jey Di Vens 2024-yilgi prezidentlik kampaniyasi paytida Netanyaxuning fikrlariga o‘xshash bayonot bergan edi. U Buyuk Britaniya "yadro quroliga ega bo‘ladigan birinchi haqiqiy islomiy mamlakat"ga aylanishi mumkinligini aytgan edi.

London meri Sodiq Xon ham xorijdagi o‘ngchi yetakchilar, jumladan, Donald Tramp tomonidan islomofobik yolg‘onlar orqali siyosiy ustunlikka erishishga qaratilgan irqchilik hujumlarining tez-tez nishoniga aylanib kelgan.

Isroil tarixidagi eng o‘ngchi hukumatga rahbarlik qilayotgan Netanyaxu an’anaviy ittifoqchilardan uzoqlashdi. Shu bilan birga, u o‘ngchi ultramillatchi arboblar, jumladan, o‘tmishda yahudiylarga qarshi (antisemitik) qarashlarga ega bo‘lgan shaxslar bilan yaqinlashdi.

Bosh vazir idorasi Netanyaxuning bayonoti Isroil hukumatining rasmiy pozitsiyasini aks ettiradimi yoki yo‘qmi, degan savolga javob bermadi. Buyuk Britaniya Tashqi ishlar, hamdo‘stlik va rivojlanish vazirligi ham ushbu masalaga darhol munosabat bildirmadi. Avvalroq Netanyaxu Trampning G‘azo bo‘yicha rejasini rad etgan edi.