Netanyaxu BMTdagi nutqida Isroil armiyasining Yaqin Sharqdagi harakatlarini himoya qildi
U minbarga chiqqanida oʻnlab delegatlar norozilik sifatida zalni tark etishdi, Isroil yetakchisi esa ularni "maʼnaviy qoʻrqoqlar" deb atadi.
Netanyaxu BMTdagi nutqida Isroilning Yaqin Sharqdagi harbiy harakatlarini himoya qildi
Isroil Bosh vaziri Benyamin Netanyaxu BMT Bosh Assambleyasidagi nutqida mamlakatining Eron, Gʻazo va Yaqin Sharqning boshqa hududlaridagi harbiy amaliyotlarini qatʼiy himoya qildi.
U zalga kirib kelayotganda oʻnlab delegatlar norozilik sifatida chiqib ketganidan soʻng, Netanyaxu Isroil kurashni davom ettirishini aytdi: "Biz gʻalaba qozonamiz. Bizda boshqa chora yoʻq".
Zalni tark etganlarga munosabat bildirar ekan, u shunday qoʻshimcha qildi: "Agar zalni tark etmagan boshqa maʼnaviy qoʻrqoqlar boʻlsa, iltimos, hoziroq chiqib keting".
Isroil rahbari, shuningdek, Isroil Gʻazoda genotsid amalga oshirayotgani haqidagi daʼvolarni rad etdi.
Kunning boshida Falastin Prezidenti Mahmud Abbos BMTga yoʻllagan videomurojaatida Isroil siyosati — ayniqsa, bosib olingan Iordan daryosining gʻarbiy sohilida yahudiy aholi punktlarining noqonuniy kengaytirilishi — "falastinliklarning oʻz vatanidagi hayoti va mavjudligiga" xavf solayotganini aytdi.
Uning soʻzlariga koʻra, bu Isroil va Falastin oʻrtasidagi tinchlik uchun xalqaro miqyosda qoʻllab-quvvatlanadigan ikki davlat tamoyiliga asoslangan yechimga ham putur yetkazadi.
Abbosning taʼkidlashicha, falastinliklar Gʻazoda Isroil harbiylari tomonidan amalga oshirilayotgan "qotillik, vayronagarchilik, ochlik va koʻchirishga urinishlar, shuningdek, genotsid urushi"ga duch kelmoqda.
Falastin rahbari AQShga kirish vizasi berilmagani sababli yillik yigʻilishda videoaloqa orqali nutq soʻzladi.
Urush jinoyatlarida ayblanib, Xalqaro jinoiy sud tomonidan hibsga olishga order berilgan Netanyaxu oʻzini tanqid qilgan davlatlar va rahbarlarga keskin hujum qildi.
"Ular Isroilni, mitti Isroilni kolonializmda ayblashmoqda — qanaqadir kolonializm. Bizni kim ayblamoqda? Ular orasida Buyuk Britaniya va Frantsiya vakillari bor. Xudo haqqi, bu atamani ularning oʻzlari oʻylab topgan-ku", dedi u.
U, shuningdek, Turkiya Prezidenti Rejep Tayyip Erdoʻgʻanni Falastinning Hamas qurolli guruhini qoʻllab-quvvatlashda ayblab, "tiran" deb atadi.
Erdoʻgʻan seshanba kuni BMTda soʻzlagan nutqida Gʻazo va Iordan daryosining gʻarbiy sohilidagi odamlar duch kelayotgan adolatsizliklar "insoniyat vijdonini qattiq yaralashini" aytgan edi.
Nyu-York shahrining chap qanot meri Zohran Mamdani ham Isroil rahbarining hujumiga uchradi — u avvalroq Netanyaxuni hibsga olishga vaʼda bergan, biroq keyinchalik bunga vakolati yoʻqligini aytgan edi.
"Siz ushbu shahar meri etib saylanganingizdan beri koʻplab yahudiylar Nyu-Yorkda oʻzlarini xavfsiz his qilmayapti", dedi Isroil bosh vaziri.
Mamdani idorasi bergan bayonotda Netanyaxu "oʻz nutqidan falastinliklarga qarshi genotsidini oqlashga qaratilgan asossiz yolgʻonlarni takrorlash uchun foydalangani" aytildi.
Netanyaxu, shuningdek, AQSh Prezidenti Donald Trampga "jasur rahbarligi" uchun minnatdorchilik bildirdi va fevral oyida AQSh va Isroil Tehronga qarshi birgalikda amalga oshirgan havo hujumlarini tilga oldi.
"Isroil va Amerika nafaqat oʻzimizni himoya qilish, balki tsivilizatsiyani saqlab qolish uchun ham birgalikda harakat qildi", dedi u.
Nyu-Yorkda Netanyaxuning tashrifiga norozilik bildirgan bir necha kishi hibsga olindi. Ular orasida Oskar mukofoti sovrindori, aktrisa Syuzan Sarandon va Emmi mukofoti sovrindori, aktrisa Xanna Eynbinder ham bor edi.
Isroil harbiylari 2023 yil 7 oktyabrda Hamasning Isroilga qilgan hujumidan keyin Gʻazo sektorida quruqlikdagi operatsiyani boshlagan edi. Oʻsha hujumda 1200 ga yaqin odam halok boʻlgan va 251 kishi garovga olingan edi.
Isroil harbiy kampaniyasi davomida Gʻazoda 73 920 dan ortiq odam halok boʻldi, deb xabar beradi hududdagi Hamas nazoratidagi sogʻliqni saqlash vazirligi.
Oʻtgan yili genotsid boʻyicha dunyoning yetakchi olimlari uyushmasi Isroil Gʻazoda genotsid sodir etayotganini maʼlum qilgan edi.
Genotsid tadqiqotchilari xalqaro uyushmasi (IAGS) tomonidan qabul qilingan rezolyutsiyada Isroilning xatti-harakatlari BMTning genotsid toʻgʻrisidagi konventsiyasida belgilangan huquqiy taʼrifga mos kelishi aytilgan.
Isroil Gʻazodagi harakatlari genotsid ekanligini bir necha bor rad etib, ularni oʻzini himoya qilish sifatida oqlab keladi.
28 fevral kuni Isroil va AQSh Eronni yashirincha yadroviy qurol ishlab chiqishda gumon qilib, unga qarshi keng koʻlamli havo hujumlarini boshladi — Tehron bu daʼvoni rad etmoqda.
Eron bunga javoban Isroilga va AQSh harbiy bazalari joylashgan qoʻshni Fors koʻrfazi arab davlatlariga raketa va dronlar bilan hujum qildi.