Nepaldagi halokatli toshqinlar: qurbonlar 160dan oshdi, 1500 kishi bedarak yoʻqolgan
Himolay daryosiga loy va tosh massasi qulab tushib, halokatli suv toshqinlarini keltirib chiqardi. Rasmiylarga koʻra, fojia oqibatida 160 dan ortiq inson halok boʻlgan. Nepal va Xitoyning Tibet hududi boʻylab qariyb 1500 kishi, jumladan 800 nafar chet el fuqarosi bedarak yoʻqoldi.
Nepalda yuz bergan halokatli suv toshqinlari oqibatida qurbonlar soni 160 nafardan oshdi, 1500 kishi bedarak yoʻqolgan.
26-avgust kuni tongda boshlangan ushbu tabiiy ofat Tibetdagi Lxasa va Nepal poytaxti Katmanduni bogʻlovchi, sayyohlar va ziyoratchilar gavjum boʻlgan togʻli hududni vayron qildi. Politsiya omon qolganlarni qidirish va minglab odamlarga favqulodda yordam yuklarini yetkazish uchun vertolyotlardan foydalanmoqda.
Qurbonlar soni 165 nafardan ham oshishi kutilmoqda. Politsiya matbuot kotibi Abi Narayanning soʻzlariga koʻra, "bu raqam oshadi, chunki biz qidiruv ishlarini qayta tikladik va yana koʻplab jasadlar topilishi kutilmoqda".
Politsiya va turizm rasmiylarining maʼlumotlariga koʻra, Nepalda bedarak yoʻqolgan 826 kishining qariyb 600 nafari xorijliklardir. Bedarak yoʻqolgan sayyohlarning 177 nafari Hindistondan, 63 nafari AQShdan, 34 nafari Avstraliyadan, 33 nafari Britaniyadan va 25 nafari Kanadadan ekani aytilmoqda. Shuningdek, bedarak yoʻqolganlar orasida Malayziya, Ukraina va Rossiya fuqarolari ham bor.
Tibetning Jiron okrugida yana 558 kishi bedarak yoʻqolgan, ularning 260 nafari chet el fuqarolari ekani aytilmoqda.
Tasdiqlangan videolarda Jiron chegara punkti atrofida oʻnlab odamlarni ulkan suv va vayronalar oqimi oqizib ketayotgani, oqimning quyi qismidagi Nepalda esa uylar, yoʻllar va energetika inshootlari yuvib ketilgani aks etgan.
Nepalning favqulodda vaziyatlarni boshqarish boʻyicha rasmiylari Planet Labs sunʼiy yoʻldosh tasvirlarini dastlabki oʻrganishlari natijasini eʼlon qildi. Unga koʻra, muz va tosh koʻchkisi Nepal-Xitoyning Rasuvagadi chegara punktidan 20 km shimoli-sharqda joylashgan Lende daryosiga vayronalarni olib kelgan toshqinni yuzaga keltirgan.