Nepalda suv toshqini: qidiruv-qutqaruv ishlariga armiya jalb qilinadi
Nepalning Xitoy bilan chegaradosh Rasuva togʻli hududida yuz bergan kuchli suv toshqini oqibatida kamida 157 kishi halok boʻldi. Qariyb 400 kishi bedarak yoʻqolgan deb hisoblanmoqda, ular orasida koʻplab xorijiy sayyohlar ham bor. Hududda qidiruv-qutqaruv ishlari davom etmoqda.
Nepalda yuz bergan suv toshqini oqibatida qidiruv-qutqaruv ishlariga armiya jalb etilmoqda. Nepal politsiyasining 26-avgustdagi maʼlumotlariga koʻra, ushbu tabiiy ofat qurbonlari soni kamida 157 nafarga yetgan.
Avvalroq 384 kishi, jumladan, 290 nafar xorijlik bedarak yoʻqolgani xabar qilingan edi. Keyinchalik Nepal Turizm vazirligi bedarak yoʻqolgan xorijiy fuqarolar sonini 341 nafar deb koʻrsatdi. Dpa agentligi Nepal Tourism milliy turizm tashkilotiga tayanib xabar berishicha, qutqaruvchilar Germaniya, Ispaniya, Niderlandiya, AQSH, Avstraliya, Buyuk Britaniya va boshqa davlatlardan kelgan sayyohlarni ham qidirmoqda. Bedarak yoʻqolgan xorijiy sayyohlarning eng katta qismini Hindiston fuqarolari tashkil etadi.
Nepal politsiyasi Xitoyning Tibet hududi bilan chegarada bedarak yoʻqolganlar orasida 26 nafar politsiya xodimi ham borligini maʼlum qildi. Rasmiylar halok boʻlganlar va jabrlanganlarning yakuniy soni, shuningdek, tabiiy ofat yetkazgan zararning umumiy koʻlami keyinroq aniqlanishini bildirdi.
Suv toshqiniga aynan nima sabab boʻlgani hozircha aniq emas. Dpa maʼlumotiga koʻra, tabiiy ofat muzlik koʻlining toʻsatdan yorilib ketishi natijasida kelib chiqqan boʻlishi ehtimoli ham koʻrib chiqilmoqda. Suv toshqini Tibetdan boshlanib, Nepalning Bagmati-Pradesh provinsiyasi orqali oqib oʻtuvchi Bxote-Koshi daryosida suv sathining keskin koʻtarilishi ortidan sodir boʻlgan.
Daryo boʻyida joylashgan aholi punktlari, xususan, Timure va Syaprubesi tabiiy ofatdan eng koʻp zarar koʻrgan hududlar qatorida qayd etilgan. Suv bozor hududlari va turar joylarni bosgan. Politsiya boʻlinmalari va gidroenergetika obyektlariga jiddiy zarar yetgan, koʻpriklar hamda avtomobil yoʻllari vayron boʻlgan.
Hodisa joyida qidiruv-qutqaruv ishlari davom etmoqda. Qizil Xochning mintaqaviy boʻlimi Rasuva hududiga gumanitar yuklar bilan favqulodda yordam guruhini yuborgan. Nepal bosh vaziri Balendra Shox qutqaruv operatsiyalariga mamlakat armiyasi va xavfsizlik xizmatlari ham jalb qilinishini maʼlum qildi.
Tabiiy ofat Xitoy tomonida ham ogʻir oqibatlarga olib kelgan. Xitoyning "Sinxua" davlat axborot agentligi maʼlumotiga koʻra, 26-avgust kuni ertalab sodir boʻlgan koʻchkidan keyin Xitoy janubi-gʻarbidagi Girong okrugida joylashgan shu nomdagi nazorat-oʻtkazish punktida koʻplab halok boʻlganlar, jabrlanganlar va bedarak yoʻqolganlar qayd etilgan.