NATO qiruvchisi Ruminiya osmonida dronni urib tushirdi
NATO missiyasi doirasida Ruminiyada joylashtirilgan Ispaniyaning ikkita F-18 qiruvchi samolyoti Moldova chegarasi yaqinida noma’lum dronni zararsizlantirdi. Bu haqda Euronews xabariga ko‘ra, Ruminiya mudofaa vaziri Radu Mirutsa ma’lum qildi.
Noma’lum havo nishoni mahalliy vaqt bilan soat 04:44 da Galats shahridan 24 kilometr shimolda aniqlangan. Shundan so‘ng yuqori jangovar shaylikda turgan ikki F-18 qiruvchisiga nishonni tutish buyrug‘i berilgan. Dronning qayerdan kelgani hozircha aniqlanmagan. Ruminiya harbiylari uni mamlakat janubi-sharqidagi Baleni va Kudolbi aholi punktlari oralig‘ida, Moldova chegarasiga yaqin hududda tutib, zararsizlantirgan.
Mudofaa vaziri ispan uchuvchilari hamda Ruminiya qo‘mondonlik markazida xizmat qilayotgan harbiylarga minnatdorlik bildirgan. "Ruminiya o‘z havo hududini himoya qilmoqda", dedi Mirutsa. U NATO ittifoqchilarining qo‘llab-quvvatlashi kuzatuv, tezkor javob va alyans davlatlari o‘rtasidagi birdamlikka asoslangan xavfsizlik kafolati ekanini ta’kidladi. Vazir Ruminiya Yevropa Ittifoqining mudofaa frontidagi davlatlardan biri ekanini qayd etdi. Mamlakat Ukrainaga qariyb 614 kilometr uzunlikdagi quruqlik chegarasi orqali tutashadi.
**Ruminiya havo hududidagi hodisalar**
Dronning Ruminiya havo hududiga kirishi Rossiya va Ukraina o‘rtasida navbatdagi tungi o‘zaro zarbalar almashinuvi fonida yuz berdi. Rossiyaning Kiyevga bergan zarbalari oqibatida shaharda yirik yong‘inlar yuzaga kelgan va kamida ikki kishi jarohatlangan. Moskva esa Ukraina tomonidan uchirilgan 600 dan ortiq dron hujumiga uchraganini, Rossiya hududida uch kishi jarohatlanganini bildirdi.
Bu Ruminiyaning havo hududida so‘nggi haftalarda qayd etilgan ilk shunday hodisa emas. O‘tgan payshanba kuni ham Ispaniyaning ikki F-18 qiruvchisi Ukraina bilan chegaradagi daryo yaqinida noma’lum uchish apparati aniqlangach, havoga ko‘tarilgan edi. Dron Ruminiya hududida qariyb 12 daqiqa bo‘lib, keyin Ukraina tomon qaytib ketgan. Bir kun o‘tib esa yana bir dron Ruminiya havo hududidan juda past balandlikda uchib o‘tgan va radarlar tomonidan aniqlanmagan. Qurilma mamlakat hududiga qulagan. Shundan so‘ng Boltiqbo‘yida ham keskinlik kuzatilib, ittifoqchi qiruvchilar Latviya hududida yana bir dronni urib tushirgandi.
Avgust oyining boshida esa Ruminiya hududidan kirib kelgan noma’lum uchish apparati Ruminiya chegarasi yaqinidagi Bolgariya havo hududida portlagan edi. Eng jiddiy hodisalardan biri 29-may kuni sodir bo‘lgan. O‘shanda Rossiya droni Galats shahridagi turar joy binosiga urilib, yong‘in chiqishiga sabab bo‘lgan va ikki kishi jarohatlangan. NATO bu hodisani Rossiya tomonidan sodir etilgan mas’uliyatsiz eskalatsiya deb baholagandi. NATO bosh kotibi Mark Ryutte o‘shanda alyans bunday tahdidlardan ittifoqchilar hududining har bir qarichini himoya qilishga tayyor ekanini bildirgandi.