Narendra Modi O‘zbekistonning “Oliy darajali do‘stlik” ordeni bilan taqdirlandi
Hindiston bosh vaziri Narendra Modi O‘zbekistonning 'Oliy darajali do‘stlik' ordeni bilan taqdirlandi. Mukofot unga O‘zbekiston va Hindiston xalqlari o‘rtasidagi azaliy do‘stlik rishtalarini mustahkamlash va ikki davlat o‘rtasidagi hamkorlikni rivojlantirishga qo‘shgan hissasi uchun berildi.
Narendra Modi O‘zbekistonning "Oliy darajali do‘stlik" ordeni bilan taqdirlandi. Bu haqda Prezident matbuot xizmati xabar berdi.
Ko‘ksaroy qarorgohida Hindiston bosh vaziri Narendra Modiga O‘zbekiston Respublikasining "Oliy darajali do‘stlik" ordeni topshirildi. Mukofotni O‘zbekiston prezidenti Shavkat Mirziyoyev Hindiston bosh vazirining ikki xalq o‘rtasidagi azaliy do‘stlik rishtalarini mustahkamlashga qo‘shgan hissasi uchun topshirdi.
Marosimda Hindistonning so‘nggi yillardagi jadal taraqqiyoti va mamlakatning xalqaro maydondagi nufuzi ortib borayotgani qayd etildi. Bu jarayon mamlakat rahbarining samarali faoliyati hamda amalga oshirilayotgan dastur va strategiyalar bilan bog‘liq ekani ta’kidlandi.
Shavkat Mirziyoyev ushbu mukofot Hindiston bosh vazirining O‘zbekiston va Hindiston xalqlari o‘rtasidagi do‘stlik va hamkorlikni rivojlantirishdagi xizmatlariga O‘zbekiston xalqi va davlatining yuksak ehtiromi ifodasi ekanini bildirdi.
Narendra Modining O‘zbekistonga tashrifi doirasida o‘tkazilgan muzokaralar natijasida ikki davlat o‘rtasidagi munosabatlarni keng qamrovli strategik sheriklik darajasiga ko‘tarishga kelishilgan. Tomonlar siyosiy-diplomatik, savdo-iqtisodiy, investitsiya, transport va madaniy-gumanitar sohalardagi hamkorlikni yangi bosqichga olib chiqish masalalarini muhokama qildi.
Prezident Mirziyoyev "Oliy darajali do‘stlik" ordeni O‘zbekiston va Hindiston o‘rtasidagi o‘zaro manfaatli hamkorlikni yanada rivojlantirishiga ishonch bildirdi. "Umumiy intilish va harakatlarimiz bilan ko‘p qirrali va uzoq muddatli aloqalarimiz kelgusida ham jadal rivojlanib borishiga aminman", — dedi davlat rahbari.