Namanganda ikkita kater toʻqnashib ketdi
Holat 23-avgust kuni Sirdaryo daryosining Toʻraqoʻrgʻon tumanidan oʻtgan hududida yuz bergan. Hodisa oqibatida ikki kishi halok boʻlgani aytilmoqda.
Namangan viloyatida ikki kater ishtirokida toʻqnashuv sodir boʻldi.
Joriy yilning 23-avgust kuni Namangan viloyatida, Sirdaryo daryosining Toʻraqoʻrgʻon tumani hududidan oʻtgan qismida, dam oluvchilarni olib ketayotgan ikkita kater bir-biriga urildi.
Kun.uz manbasining xabar berishicha, ushbu hodisa hududdagi dam olish maskani mehmonlarini sayr qildirish maqsadida harakatlanayotgan katerlarning koʻprik ostida toʻqnashuvi natijasida yuzaga kelgan. Dastlabki maʼlumotlarga koʻra, ushbu baxtsiz hodisa oqibatida ikki kishi hayotdan koʻz yumgan.
Tahririyatga taqdim etilgan videotasvirlarda qutqaruv nimchalarini kiygan shaxslarning suvda oqib ketayotgani va katerlardagi odamlarning ularni qutqarishga urinayotgani aks etgan.
Hozirgi vaqtda mazkur hodisa yuzasidan tegishli tashkilotlar tomonidan rasmiy izoh berilmagan.