Namangan viloyatida yashovchi fuqaro terrorchilarni yollash va moliyalashtirishda ayblanib, 15 yilga ozodlikdan mahrum etildi

2 soat oldin

Namangan viloyati Pop tumanida yashovchi fuqaro xalqaro terrorchilik tashkilotida ishtirok etish, jangarilarni moliyalashtirish va vatandoshlarni Suriyaga yuborishning noqonuniy kanalini tashkil etishda ayblanib, 15 yil-u 2 oy muddatga ozodlikdan mahrum etildi. Tergov jarayonida u tomonidan jangovar harakatlar hududiga olib chiqib ketilganlar orasida Oʻzbekiston fuqarolari, jumladan, uch yoshga toʻlmagan bolalari boʻlgan ayollar ham borligi aniqlandi.

Ish materiallariga koʻra, erkak ekstremistik gʻoyalarga 2004 yildayoq pul topish uchun borgan Rossiyadagi faoliyati davomida qiziqa boshlagan. 2009 yilda u sherigi bilan birga Moskvadagi «Vixino» metro bekati yaqinida «Halol» umumiy ovqatlanish shoxobchasini ochgan. Ushbu muassasada yashirin diniy yigʻilishlar oʻtkazilib, unda erkak «Turkiston islom harakati» yetakchisi Tohir Yoʻldoshevning maʼruzalarini va «jihod»ga chorlovchi yollash videomateriallarini tomosha qilgan.

2010 yil sentyabr oyida erkak Eronga yoʻl olgan, keyin esa Pokistonga oʻtgan. Shimoliy Vaziriston hududida u «Jamoat Ansorulloh» xalqaro terrorchilik tashkilotiga aʼzo boʻlib, «Sodiq» taxallusi ostida qasamyod («bayʼat») qilgan va jangovar lagerda harbiy hamda mina-portlovchi tayyorgarlik kursini oʻtagan.

2012 yil sentyabr oyida u Turkiya orqali tranzit bilan Suriyaning Idlib viloyatiga oʻtib, u yerda «Jabhat an-Nusra» guruhiga qoʻshilgan, 2013 yildan boshlab esa taʼminotchi sifatida «Katiba Tavhid va Jihod» guruhiga aʼzo boʻlgan. Tergov aniqlashicha, 2020 yil oxirida u Idlibda novvoyxona ochib, uning daromadining 60 foizini — haftasiga 250 dollardan 350 dollargacha — jangarilar faoliyatini moliyalashtirish uchun muntazam ravishda oʻtkazib turgan.

Keyinchalik uning faoliyati 2021 yil sentyabr oyida oilasi bilan koʻchib oʻtgan Turkiyada davom etgan. Istanbulda boʻlgan vaqtida erkak «Katiba Tavhid va Jihod» va «Katiba Guroba» terrorchilik tashkilotlari bilan aloqalarini saqlab qolgan. 2025 yilning may oyidan oktyabr oyigacha u sheriklari bilan birgalikda Turkiyadan Suriyaga yangi yollanganlarni noqonuniy oʻtkazishning doimiy kanalini tashkil qilgan va har bir oʻtkazilgan shaxs uchun 500 dollardan 1 000 dollargacha pul olgan. U tomonidan oʻtkazilgan shaxslar orasida oʻnlab Oʻzbekiston fuqarolari, jumladan, voyaga yetmagan bolalari boʻlgan ayollar ham bor boʻlib, ularning ayrimlari hali uch yoshga ham toʻlmagan edi. Navbatdagi yollanganlar guruhini oʻtkazishga urinish paytida, 2025 yil 11 oktyabrda u Turkiya huquq-tartibot idoralari tomonidan qoʻlga olingan.

Bundan tashqari, erkak yuk tashish biznesi niqobi ostida Suriyadagi jangarilarga turli tovarlar, uskunalar va ehtiyot qismlar yetkazib bergan. Shuningdek, tergov aniqlashicha, u Telegram va WhatsApp messenjerlari orqali «Abu Asiya» taxallusi ostida Oʻzbekiston, Tojikiston va Qirgʻiziston fuqarolarining pasportlari, biometrik hujjatlari va ID-kartalari nusxalarini noqonuniy ravishda yiqqan, saqlagan va uchinchi shaxslarga topshirgan.

Tergov davomida unga nisbatan Jinoyat kodeksining bir nechta moddalari, jumladan, shaxsga doir maʼlumotlar toʻgʻrisidagi qonunchilikni buzish, yollanish, terrorizm, terrorchilik faoliyatini amalga oshirish maqsadida taʼlim olish, terrorizmni moliyalashtirish, konstitutsiyaviy tuzumni zoʻrlik bilan oʻzgartirishga ommaviy daʼvat qilish, jinoiy uyushma tashkil etish va taqiqlangan tashkilotlar faoliyatida ishtirok etish boʻyicha ayblovlar qoʻyildi.

Sud erkakni aybdor deb topdi va jinoyatlar majmuini hisobga olib, jazolarni qisman qoʻshish yoʻli bilan uzil-kesil — 15 yil-u 2 oy muddatga ozodlikdan mahrum qilish jazosini tayinladi. Mahkum jazoni umumiy tartibli koloniyada oʻtaydi.