Mourinyo “Real” uchun transferlar oynasi yakunlanganini ma’lum qildi

Mourinyo "Real" uchun transferlar oynasi yakunlanganini ma'lum qildi

Madridning "Real" klubi bosh murabbiyi Joze Mourinyo yozgi transfer oynasining qolgan davridagi rejalariga to'xtalib o'tdi. Portugaliyalik mutaxassis hozirda yangi futbolchilarga ehtiyoj sezmayotganini, chunki ixtiyoridagi tarkibdan to'liq qoniqish hosil qilganini bildirdi. Biroq, u transfer oynasi hali yopilmagani sababli vaziyat har lahzada o'zgarishi mumkinligini inkor etmadi. Masalan, ba'zi futbolchilar yetarli o'yin amaliyotiga ega bo'lmaganliklari sababli jamoadan ketishni istashlari mumkin.

"Mening fikrimcha, tarkib allaqachon to'liq shakllangan va men rahbariyatni kimdirga ehtiyoj borligini aytib bezovta qilmoqchi emasman. Qo'limdagi yigitlardan ko'nglim to'q. Agar kimdir jamoadan ketishni istasa, bu meni xursand qilmaydi, chunki men bu tarkibni mavsum oxirigacha saqlab qolishni istayman", dedi Mourinyo klub rasmiy saytiga bergan intervyusida.

Mutaxassis transfer oynasi yopilguniga qadar kutilmagan vaziyatlar yuzaga kelishi mumkinligini ham istisno etmadi:

"Hozircha hamma o'z ishiga mas'uliyat bilan yondashmoqda, jamoada muhit ajoyib. Lekin bu — futbol. Ertaga prezident yoki Xose Anxel qo'ng'iroq qilib, kimdir uchun dahshatli darajada yaxshi taklif kelganini aytib qolishi ham hech gap emas. Yoki biror futbolchi kelib: 'Ikki o'yindan beri zaxirada qolyapman, ketaman', deyishi ham turgan gap".

Eslatib o'tamiz, "Real" Ispaniya chempionatining yangi mavsumini g'alaba bilan boshladi — Mourinyo shogirdlari safarda "Espanyol"ni 2:1 hisobida mag'lub etdi. "Qirollik klubi" navbatdagi o'yinini o'z maydonida "Real Sosyedad"ga qarshi o'tkazadi.