Moskva va Boku o‘rtasidagi keskinlik: diaspora rahbari deportatsiya qilindi, uch rossiyalik qidiruvga berildi
Ozarboyjon Rossiyaning uch nafar fuqarosini sirtdan hibsga olib, qidiruvga berdi, Moskvadagi Ozarboyjon diasporasi rahbari Baxtiyor Gasanov Rossiyadan deportatsiya qilindi.
Moskva va Boku o‘rtasidagi munosabatlar keskinlashmoqda: diaspora yetakchisi deportatsiya qilindi, uch nafar rossiyalik qidiruvga berildi.
Ozarboyjonning APA agentligi xabariga ko‘ra, Moskvadagi Ozarboyjon diasporasi rahbari Baxtiyor Gasanov Rossiyadan chiqarib yuborilgan. Gasanov 2025-yilda Rossiya fuqaroligidan mahrum etilgan edi. Iyun oyida u hibsga olinib, Migrantlarni vaqtincha saqlash markaziga joylashtirilgan.
17-avgust kuni Ozarboyjon uch nafar Rossiya fuqarosini – Rossiya Transport vazirligi rahbari maslahatchisi Aleksey Chadayevni, «Moskva 24» telekanali boshlovchisi Ivan Knyazevni va siyosiy maslahatchi Semyon Uralovni sirtdan hibsga olib, qidiruvga berdi. Ularga YouTube’dagi Ozarboyjonga bag‘ishlangan ko‘rsatuvda bildirgan fikrlari uchun «adovat qo‘zg‘atish» va «terrorchilikka da’vat qilish» aybi qo‘yilgan.
Ozarboyjon va Rossiya rasmiylari 2025-yilning yozida Rossiya Federatsiyasi hududida Ozarboyjon diasporalari vakillariga qarshi ommaviy reydlar o‘tkazilganidan buyon bir-birlarining fuqarolarini o‘zaro ta’qib qilib kelmoqda. Ozarboyjon ham, o‘z navbatida, Rossiya targ‘ibot ommaviy axborot vositalarining bir necha xodimini hamda 11 nafar tasodifiy rossiyalikni – sayyohlar va relokantlarni hibsga olgan. OAV xodimlari bir necha oydan so‘ng ozod qilingan, qolganlar esa real qamoq muddatlariga hukm qilingan.